भांगरभूंय | प्रतिनिधी
अासगांव प्रकरणांत मुख्यमंत्री, 2- 3 आमदार, एक केंद्रीय राज्यमंत्री, साबार पक्षांचे जाळवणदार….. सगलेच मुखार सरिल्ले आसतना आगरवाडेकार कुटुंबान अचकीत कागाळ फाटल्यान घेवपाचो निर्णय घेतलो, हाचें अजाप दिसले बगर रावलें ना. तांची कितें तरी अडचण आसतली वा धमकी, हांयस हांचो वापर बी केला आसतलो. तें कळप कठीण, पूण हो समेस्त लोकप्रतिनिधींचो, सरकाराचोय एका तरेचो अपमानूच. आयपीएस पुलीस अधिकाऱ्याक वाटावपा खातीर तांचेर हो निर्णय घेवपाक चेपण हाडलां, असो आरोप आमदार अॅड. कार्लुस फेरेरान केला. निवृत्त न्यायाधिशा वरवीं ह्या पुराय प्रकरणाची चवकशी करची, अशें तांणी मागलां. जर कोणाक वाटावपाक चेपण बी हाडलां जाल्यार ‘इंद्राय स्वाहा, तक्षकाय स्वाहा’ जावंदी. कायद्या प्रमाण आतां ही कागाळ फाटीं घेवपाक मेळना खंय. प्रकरण मिटोवपाचे यत्न चल्ल्यात तरी सरकार मात्तूय तडजोड करचें ना. हातूंत घुस्पल्ल्यांचेर कारवाय करतले, अशें मुख्यमंत्री डाॅ. प्रमोद सावंत हांणी जाहीर केलां. कोणाचेर अन्याय जाला वा कोणाचें लुकसाण जालां म्हूण न्हय, तर हे प्रवृत्तीची बोडकी चेंचपा खातीर कारवाय जावप खूब गरजेचें. नाजाल्यार सध्याच मात्तिल्ली ही विखा वेल पुराय गोंयाक वेटोळो घालतली. बावन्सरांचें काम व्हीआयपींक राखण दिवपाचें, कार्यावळीक सुरक्षा दिवपाचें. इतले पुरतेंच तें उरुंदी.
व्हीव्हीआयपी आसगांव प्रकरणाच्या विरोधांत आसा म्हणटकच सरकारी यंत्रणा धडाधड कामाक लागल्यात. सध्या लिपून बशिल्ल्या दोगा बावन्सरांक ताब्यांत घेतल्यात. तांची गाडीय जप्त केल्या. ते नेमके कोण, कोणा खातीर काम करतात, तांची संघटणा आसा काय कितें, ताचीय चवकशी केल्यार बरी. रीण वसुले खातीर वा कोणाक धमकावपाक, बेकायदेशीर कामां खातीर जर बावन्सरांचो वापर जाता जाल्यार सरकाराक चड कडक पावलां उखलचीं पडटलीं. मुख्य सचिवान हणजूण पुलीस स्टेशनाच्या तिगां पुलीस अधिकाऱ्यांक निलंबीत केल्यात. तांचो ह्या प्रकरणांत हात आसा, काय तांणी घडणूक थळाचेर वचून कारवाय करपाक उशीर केलो, हें रोखडेंच स्पश्ट जातलें. खरें म्हणल्यार पुलिसांनी खंयचेय कागाळेची बेगोबेग दखल घेवपाक जाय. कितेंय चोरयेक गेलें जाल्यार सामान शेणलें म्हूण कागाळ नोंद करप, कांय दिसांनी प्रकरण मिटोवपाचो यत्न करप असले जायते आरोप पुलिसांचेर जातात. हाचो प्रामाणीक पुलिसांचेर मागीर परिणाम जाता. पुलीस खात्यान हाची दखल घेवंक जाय.
वयर म्हणलां ते प्रमाण, व्हीव्हीआयपी आसगांव प्रकरणांत आगरवाडेकार कुटुंबाक न्याय दिवपाक मैदानांत देंवल्यात तें पळोवन बुलडोझर बाय, तिचे चेले आनी तांकां मजत करपी कायद्याच्या रक्षकांची (?) म्हातारी कुळकुळ्या आसतली. ह्या सगल्यांनी विचार करून बेगोबेग चक्रां घुंवडायल्यांत आसतलीं. मुंबयचे ते बायलेक आगरवाडेकार कुटुंबाक फोन करपाक लायला आसतलो आनी हें प्रकरण मिटोवपाचो यत्न केला आसतलो. कागाळ फाटीं घे, आमी तुजें घर आशिल्लें तशें परत बांदून दितां अशेंय सांगलां आसतलें. त्या कुटुंबानूय फुडाराक त्रास जावचे परस प्रकरण मिट्टा जाल्यार बरें जालें, असो विचार केला आसतलो. अर्थांत हे अदमास. सत्य कितें तें पुलिसांनी वा चवकशी समितीन सोदून काडपाक जाय आनी एकान एक गजाल लोकां मुखार मांडपाक जाय. ह्या प्रकरणांत घुस्पल्ल्या सगल्या मनशाची चवकशी जातली, दोशींचेर शंबर टक्के कारवाय जातली आनी गरज पडल्यार आगरवाडेकार कुटुंबाकूय चवकशी खातीर आपयतले, अशें मुख्यमंत्र्यान म्हणलां.
प्रकरण गुपचूप मिटयलें जाल्यार आमची चवकशी जावची ना आनी सगलें कितें पचतलें, असो कांय जाणांचो समज जाल्लो. पूण सरकार आपल्या निर्णयाक दसून राविल्ल्यान कारवायेक सुरवात जाल्या. ती निमाणें मेरेन चलपाक जाय. तडीक वचपाक जाय. ही बावन्सर, बुलडोझर संस्कृताय आमच्या शांत गोंयांत नाका. सिनेमाच्या शुटिंगा वेळार पुलिसां बदला बावन्सरांक बंदोबस्ताक लायतात. खूब वर्सां पयलीं एका दोतोराक मदीं आयलो म्हूण धुकलून उडोवपाचो यत्न कांय बावन्सरांनी पणजे मार्केंटांत केल्लो… आनी आतां हे आसगांवां कुटुंबाक धमकावपी बावन्सर. दर्यादेग वाठारांनी तरातरांच्या प्रवृत्तींनी तकली वयर काडल्या. सरकारी यंत्रणांक भिस्क्यार मारून त्यो थंय दादागिरी करतात. थंयचे कांय वेवसायीक तांकां भियेवन दीस काडटात वा हे सांखळेचो ते स्वताच एक वांटो जातात. घुंवळे वखदां विशीं बरोवन तर गोंयचे पत्रकारितेची लिखणी झरली. जांणी हो चिखल ना करपाक जाय, तांकांच लागून तो आनीक वाडला, हे सारकें दुसरें दुर्दैव आसचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
