भांगरभूंय | प्रतिनिधी
बर्च क्लब उजो प्रकरणांत मुख्यमंत्र्यांची शिटकावणी
जापसालदार आसल्यार आयपीएस अधिकाऱ्यांचीय चवकशी
अहवाला उपरांत अधिकाऱ्यांक नोटिसो धाडून कारवाय
भांगरभूंय । प्रतिनिधी
पणजी : बर्च बाय रोमिओ लेनीक उजो लागून 25 जाणांक मरण आयिल्ले घडणुकेक जर आयपीएस अधिकारी जापसालदार आसत जाल्यार ताची लेगीत चवकशी जातली. आयएएस, आयपीएस वा कोणूय जापसालदार आसत जाल्यार ताका सोडचे नात. चवकशी जातलीच, अशें मुख्यमंत्री डॉ. प्रमोद सावंत हांणी स्पश्ट केलें.
दंडाधिकार्या वरवीं सुरू आशिल्ले चवकशेचो अहवाल आयले उपरांत हेर संबंदीत अधिकार्यांक नोटिसो धाडून तांचेर कारवाय जातली. अहवाल आयले उपरांत घडणुकेची न्यायालयीन चवकशी करपा विशींचो निर्णय जातलो, अशें डॉ. सावंत हांणी सांगलें.
हे घडणुकेचो तपास आनी सुरक्षा स्थितीचो नियाळ घेवपा खातीर डॉ. सावंत हांणी बुधवारा बसका घेतली. तिका पर्यटनमंत्री रोहन खंवटे, मुखेल सचीव डॉ. व्ही. कांडावेलू, पुलीस म्हासंचालक आलोक कुमार तशेंच हेर अधिकारी उपस्थीत आशिल्ले. उपरांत घेतिल्ले पत्रकार परिशदेंत मुख्यमंत्र्यान ही म्हायती दिली.
क्लब घडणुकेची चवकशी चालू आसा. सरकारान दोन अधिकारी आनी तेन्नाच्या पंचायत सचिवांक निलंबीत केला. हे भायर आतां मेरेन पुलिसांनी क्लबाच्या 6 जाणांक अटक केल्या. गौरव लुथरा आनी सौरभ लुथरा हांकां अटक करपाचे यत्न चालू आसात. पुलीस सीबीआय तशेंच हेर एजन्सीच्या संपर्कांत आसात. बेगिनूच तांकां अटक जातली, अशें मुख्यमंत्र्यांनी सांगलें.
ह्या क्लबाक बांदकाम परवानो नाशिल्लो. पंचायतीन दिल्ल्या वेपारी परवान्याचेर आदारीत सगल्यो कार्यावळी क्लबांत चालू आशिल्ल्यो. सरकारान ऑडीट सुरक्षा समिती तशेंच कारवाय करपा खातीर देखरेख समिती स्थापन केल्या. पर्यटना संबंदीच्या आस्थापनां कडेन फायर एनओसी वा हेर सुरक्षा यंत्रणां नाशिल्ली जाल्यार समिती कारवाय करतली, अशें डॉ. सावंत हांणी सांगलें.
पर्यटन मोसम सुरू जाल्ल्यान कायदो, सुवेवस्थे विशीं उपाय येवजण्यो करपा सयत कारवाय करपाचे आदेश मुख्यमंत्र्यान बसकेंत दिल्यात.
नेम मोडल्यार परवानो रद्द
हॉटेलां, बार्रां, रेस्टॉरंटां, क्लब, वॉटरस्पोर्टस हांची तपासणी जातली. सुरक्षेचे उपाय नासल्यार परवानो रद्द करपाची कारवाय जातली. बार्रांक रातीं 11 उपरांत परवानो नासल्यार सोरो विकपाक मेळचो ना. दोन खेपे नेम मोडलो जाल्यार अबकारी खातें परवानो निलंबीत करतले. रेंट अ बायक, रेंट अ कार हांणी नेम मोडल्यार कारवाय जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
