भांगरभूंय | प्रतिनिधी
कोडार गांव….. बेतोडें, निरंकाल, कोनशें, कोडार पंचायतींत आनी शिरोडें मतदारसंघात येता. सैमान हातचे कांयच राखून दवरिनासतना श्रुश्टी सौंदर्याची उपाट उधळण ह्या वाठाराचेर केल्या. मोडणां घेवपी रस्तो, रस्त्याच्या दोनूय वटांनी पाचवीचार झाडां, पेडां, पावसाच्या दिसांनी दोंगुल्ले वेल्यान घसघसत व्हांवत येवपी घसघशे, बिबटे वाघ, रानदुकर, साळोरी, मोर, गवे रेडे हांचो मुक्त संचार पळोवप्याक तोंडांत बोटां घालपाक लायता.
शिंयाच्या (थंडी ) दिसांनी दाट धुक्याची चादर घेवन सुर्याच्या भांगराळ्या किरणांची वाट पळोवपी कोडार गांव अणभवप म्हळ्यार स्वर्गसूख. कोणाच्या ध्यानांत मनांत नाशिल्लो हो सुपुल्लो सुंदर गांव गाजता (trending) तो ह्या गावांत येवपाक घाल्ल्या IIT प्रोजेक्टा खातीर.
हजारभर लोकसंख्या आशिल्लो हो गांवगिरो वाठार. आशिल्ले जमनींत शेतां भातां पिकोवप हो तांचो मुखेल वेवसाय. हळू हळू पडीक जमनीचेर घाम गळोवन आनी रगत आटोवन परंपरीक पद्दतीन तांणी कुळागरां वसयलीं आनी पर्यावरण हरवें पाचवें दवरपाक आनी पर्यावरणाचो समतोल सादपाक शिंवाचो वांटो उखल्लो.
पावसा दिसांनी दोंगोर माथ्यार तवशीं, चिबडां, करांदे, मिरसांगेची वट्टा (porsu) फुलोवप आनी तयार जाल्ले उत्पन्न आठ धा कि. मि. अशिल्ल्या फोंडें बाजरांत विकपाक व्हरप. फोंडें बाजरांत ज्यो परमळीत जायो येतात तातूंतलो व्हड वांटो कोडारच्या जायांचो आसता. फाटलीं चाळीस पन्नास वर्सां हो कश्टकरी समाज हे मातयेंत आपलो घाम गळयता.
हालींच्या वर्सांनी गाडी घोडे दारादारांनी घोळटात. ताचे पयलीं दोंगोर माथ्या वेल्यान वजीं, पाटले माथ्यार मारून आठ धा कि. मि. कोडारच्यान फोंड्यां यो-वच करताले आनी आपले पोट चलयताले. थोड्या गांवकारांनी आपली अर्थीक येणावळ वाडोवपाक घरांनी ल्हान ल्हान दुकानां सुरू केल्यांत.
कांय वर्सां पयलीं गोंयचे आदले मुख्यमंत्री मानादीक मनोहर भाई पर्रीकर हांणी ह्या सुंदर आनी सुपुल्ल्या अशा कोडार (कोडरा ) गांवाक भेट दिल्ली. Agricultural Department हांणी घडोवन हाडिल्ल्या शेतकार मेळाव्या खातीर वेळांत वेळ काडून ते आयिल्ले.
सुवाळ्याचे सुरवातीक थळाव्या ग्रामस्थांनी (शेतकार भाव ) तांकां surprise Gift म्हणून आपल्या पोरसांत पिकयिल्लीं तवशीं, दोडगीं, चिबडां ह्या वस्तूनी भरिल्लो कुर्पणो माचयेर व्हरून भेटयिल्लो, आनी मनोहर भाईन ह्या कश्टकरी समाजाची तोंड भरून तोखणाय केल्ली आनी तन्नी करकरीत तवश्यांचो आस्वाद घेतिल्लो. शेतकी खात्यान शेतकारां खातीर ज्यो नव्यो येवजण्यो हाडल्यात ताचेर भाईंच्या उपस्थितींत शेतकरां कडेन भासाभास (Interaction) घडोवन हाडिल्ली.
आपल्या मुख्यमंत्र्यांक पळोवपाक आनी तांचे मोलादीक विचार आयकून घेवपाक कोडारच्या सोमनाथ देवस्थानांत शेतकार भावांनी उप्पाट गर्दी केल्ली आनी आपलो बिनशर्त तेंको तांकां दिल्लो.
…आनी आयज होच गांवगिरो वाठार आनी गांव पोरको जाला…. जाला न्हय तर ताका पोरको केला. गांवांतल्यान नियोजीत IIT जाग्यार वचपी रस्तो तीन मिटर रुंदायेचो आशिल्लो… आतां तो स मिटरा वेल्यान पंदरा मिटर वाडोवपाचे आसात अशें थळाव्यां कडल्यान आयकूंक मेळटा. रस्त्याक आडमेळी थारपी झाडां कापून उडोवपा खातीर नंबर दिल्ले आसात. ताका लागून रस्त्याक आडमेळी थारपी झाडां, घरां, कुळागरां, पोरसूं काबार जातलीं हाची भिरांत लोकां मदीं उप्रासल्या आनी आपल्या काळ्या किट्ट फुडाराक लागून न्हीद उडल्या.
गांवांत येवपी IIT प्रकल्पा विशीं थळाव्याक विस्वासांत घेवक ना. नियोजीत प्रकलपा विशीं विचारल्यार थळावो आमदार / मंत्री #No #Comments म्हणत पांय पडटा आनी आपले जापसालदारकी पसून पयस वता… ताका लागून आमच्या कोडारच्या लोकांची, ” ना घर का, ना घाटका ” अशी अावतिकाय जाल्या.
जे उमेदीन आनी विस्वासान कांय वर्सां पयलीं ह्याच शेतकार आनी काबाड कश्ट करपी लोकांनी मनोहर भाईचेर आनी पक्षाचेर दोळे धांपून आपलो विस्वास दाखयिल्लो आनी तांकां उपाट मोग दिल्लो, तोच कश्टकरी समाज आयज निरशेला, हतबल जाला आनी कोडारच्या दाट रानांनी शेणिल्ले भशेन जाला. हळू हळू समाज जागो जावपाक लागला आनी आतां पोटतिडकीन पेटून उठना जाल्यार पोट जमनीर लावन न्हिदचें पडटलें ही भावना तांचे मदी जागृत जाल्या.
सद्याची कोडार गांवांतली अावतिकाय पळयत जाल्यार सर्गेस्त मनोहर भाईक किदें दिसता आसतलें?
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
