भांगरभूंय | प्रतिनिधी
फोंडें: किर्लपाल पंचायत वाठारांत बंद आशिल्ल्या विवीध खण पिटांनी व्हड प्रमाणांत उदकाचो सांठो आसा. अंदूं घोग्यांनी पडिल्ल्या पावसाक लागून कोडली वाठारांत बंद आशिल्ल्या खण पिटांनी पयलेच खेपे व्हड प्रमाणांत उदकाचो सांठो जाला. ताका लागून ओपा प्रकल्पाक उदकाचो उणाव जावपाची शक्यताय उणी आसा.
कोडले सुमार 6- 7 बंद खण पीट आसात. दुदसागर न्हंये पासून सुमार 30- 340 मिटर अंतराचेर आशिल्ल्या ह्या खणं पिटांतल्या उदकाची पातळी वाडल्या. हाचो फायदो ओपा प्रकल्पाक जातलो. दुदसागर न्हंयेच्या उदकाची पातळी देंवले उपरांत हे आदीं उदकास्रोत खात्यान एप्रील आनी मे म्हयन्यांत खण पिटांतलें उदक न्हंयेंत सोडून प्रकल्पाक फावोशें उदक उपलब्ध करून दिल्लें. आदीं खण कंपनी पंप बसोवन खण पिटांतलें उदक न्हंयेंत सोडटाले. पूण फाटल्या 10- 12 वर्सां सावन सगळ्योच खणी बंद आशिल्ल्यान खण पिटांतलें उदक पंपा वरवीं न्हंयेंत सोडिनात. हाका लागून उदकाचो सांठो खण पिटांनी दिसता. कोडली वाठारांतल्या बंद खण पिटांत जाल्लो व्हड प्रमाणांतलो उदकाचो सांठो हेडग्यां गोरवां खातीर घातक थारू येता. खण पिटाचे कुशीक आशिल्ले वाटे वयल्यान खूबशीं गोरवां येतात- वतात. तशेंच सुटयेच्या दिसांनी कांय चले- चलयो ह्या खण पिटा कडेन येतात. ह्या निर्जन सुवातेर पुलीस गस्त घालिनाशिल्ल्यान एकाद्या वेळार खुना सारके गुन्यांव घडपाची शक्यताय थळावे लोक उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
