भांगरभूंय | प्रतिनिधी
भगवान मुंडा जयंती रॅलीचेर वेळीप हांचो प्रस्न
मडगाव : भगवान बिरसा मुंडा हांचे जयंती निमतान राज्यभर रॅलीचें आयोजन केल्लें. फाटले फावटीं रॅलीचेर ८ कोटींचो खर्च केल्लो. अशे तरेन कोट्यांनी रुपया खर्च करून आदिवासी समाजाक कितें फायदो जातलो आनी तातुंतल्यान कितें साध्य जातलें? अशें आदले मंत्री प्रकाश वेळीप हांणी विचारलें. नवे पिळगेक प्रेरणा मेळपा खातीर राज्यांत मध्यवर्ती सुवातेर भगवान मुंडा हांचें स्मारक उबारचें आनी आदिवासी समाजाच्यो मागण्यो मान्य करच्यो अशी मागणी तांणी केली.
युनायटेड ट्रायबल असोसिएशन अलायन्स ऑफ गावडा, कुणबी, वेळीप हे संस्थे वतीन पत्रकार परिशद घेतली. ह्या वेळार आदले मंत्री प्रकाश वेळीप, अध्यक्ष विश्वास गावडे, दया गांवकार आनी हेर हाजीर आशिल्ले. ह्या वेळार वेळीप हांणी सांगलें, संस्थे वतीन भगवान बिरसा मुंडा जयंती उत्सव १५ नोव्हेंबराक पोरणें गोंयां दनपरां तीन वरांचेर जातलो. बिरसा मुंडा हांचे विशीं गोंयच्या लोकांक विवीध कार्यावळींतल्यान म्हायती करुन दिली. बिरसा मुंडा जिवे आशिल्ले जाल्यार आदिवासी समाजाचे खुबशे प्रस्न पयलींच सुटपाचे. आतांय राज्यांतल्या आदिवासी समाजाचे प्रस्न आडकून आसात. जयंती निमतान फकत रॅली काडून कांयच जावचें ना. मुंडा हांचें स्मारक राज्याच्या मध्यवर्ती सुवातेर आसचें. हातुंतल्यान नवे पिळगेक प्रेरणा मेळटली. तशेंच बिरसा मुंडा हांच्या नांवान दोन पुरस्कार राष्ट्रीय पांवड्यार काम करपी मनशांक दितले, अशें सांगलें.
राज्यांत आदिवासी भवन जावचें ही आदिवासी समाजाची मागणी प्रलंबीत आसा. ताचेर विचार जावचो आनी बेगोबेग कार्यवाही सुरु करची. राज्यांत शेड्युल एरिया आजूनय करूंक ना. पळोवणे उपरांत राज्य सरकारान शेड्युल एरिया जाहीर करची. राज्यांतल्यो आदिवासी समाजाच्यो जमनी बिगर आदिवासींक विकचे ना, हे खातीर गरजेचे उपाय येवजण करपाची गरज आसा. तशेंच एसटी कॉर्पोरेशनाचें कार्यालय मडगांवां आशिल्ल्यान ताचो फायदो दक्षीण गोंयच्या एसटी भावांक जाता. मात, हाचें स्थलांतर पणजी करपाचे यत्न चालूच आसात. दक्षीण गोंयांत एसटी समाजाचो आंकडो पळयल्यार कार्यालय स्थलांतर करचें न्हय, अशी मागणी वेळीप हांणी केली.
राजकी आरक्षण प्रक्रिया बेगीन करची
राज्यांतल्या एसटी भावांक आरक्षण मेळिल्ल्याक आतां मेरेन बरोच काळ वचूनय राजकीय आरक्षणाचो हक्क मेळूंक ना. आतां केंद्रा कडल्यान राजकीय आरक्षणाचो हक्क मेळिल्ल्यान ताची अंमलबजावणी खातीर कसलेंच आडमेळें ना, हाका लागून तीन म्हयन्यांत आरक्षण प्रक्रिया पुराय करची आनी २०२७ चे वेंचणुके पयलीं राजकीय आरक्षण मेळचें.
राज्यांतल्या आदिवासी भावांच्यो विवीध संघटना राज्यांत कार्यरत आसात. एसटी भावांचे जायते प्रस्न आजूनय सरकारा कडल्यान प्राधान्यान सोडयनात. एसटी भावांक खंयच्याय पक्षाचें काम करपाक बंदी ना. मात, सगल्या पक्षांचें काम करुनय प्रस्न सुटनाशिल्ल्यान एसटी भावांचो स्वतंत्र पक्ष आसचो अशी चर्चा सुरु आसा. पक्षस्थापने खातीर खुबश्यो गजाली येतात, आयज ना फाल्यां राज्यांत एसटी समाजाचो पक्षूय स्थापन जावपाक शकता, अशे प्रकाश वेळीप हांणी सांगलें.
राज्य सरकारा कडल्यान रान हक्क कायद्या प्रमाण आदिवासी समाजाक तांच्या जमिनींचो मालकी हक्क दिता. केपें तशेंच काणकोण वाठारांतल्या कांय समाज भावांनी कसपी जमनी परस उण्या जमनीचे मालकी हक्क सनद करुन दिल्ल्याच्यो कागाळी केल्यात. आदिवासी भावां कडेन आशिल्ल्या सगल्या जमनींचो असलेल्या सर्व जमिनीचा हक्क तांकां मेळचो. पुराय म्हायती घेतले उपरांत प्रशासना कडेन संपर्क करतले, अशें आदले मंत्री प्रकाश वेळीप हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
