भांगरभूंय | प्रतिनिधी
फकत पणजेच न्हय, तर पुराय गोंयचें भूशण थारिल्ली सुंदर वास्तू आंतरराष्ट्रीय आर्किटेक्ट चार्लस कुरैय्या हांचे संकल्पनेंतल्यान साकार जाली. मांडवी जंय अरबी समुद्राक मेळटा, त्या दर्या संगमाचेर ही कला अकादमीची देखणी इमारत उबी रावली. पण हे सुंदर वास्तूक 2004 सावन खग्रास गिराण लागलां.
कला अकादमीचें नुतनीकरण आनी दुरुस्ती करपाच्या नांवा खाला कोट्यांनी रुपयांच्यो निविदा काडपाचें सत्र फाटल्या 16 वर्सांत जायते फावटी चल्लें. वयले वयर रंग मारप आनी कांय किरकोळ बदल करपाचे आनी हे वास्तूचें सोबितीकरण केलें असो देखावो निर्माण करपाचो ही नौटंकी लोकांच्या दोळ्यांत धुल्ल मारीत चालूच आसा. फाटलीं दोन वर्सां दुरुस्तीच्या नांवा खाला कला अकादमी बंद दवरल्या. थंयचे सगले कर्मचारी पोरण्या सचिवालय इमारतींत व्हेल्यात. नोव्हेंबर 2023 च्या इफ्फी वेळार कला अकादमी उक्ती केल्ली. पूण उपरांत लक्षांत आयलें की सदोष कामाक लागून पडप, कोसळप चालूच आसा.
कला आनी संस्कृती मंत्री भौशीक बांदकाम खात्या कडेन बोट दाखयतात आनी बांदकाम खातें हाचेर कांयच उलयना. सुमार 50 कोटी खर्च करून कला अकादमीची इमारत दुबळीच उरता आसत, तर हो पयसो नक्की कित्याचेर खर्च जालो? लोकांनी टॅक्स म्हूण सरकाराक फारीक केल्ल्या पयशांचो असो दुरुपेग कित्याक करतात? हो भ्रश्टाचार न्हय तर दुसरें कितें? डबल इंजीन सरकारान हाचीं सडेतोड म्हणटात तश्यो जापो दिवन टिका करप्यांचीं तोंडां बंद करपाक जाय.
गजानन बा. नायक भाटकार,
शिवकृपा, आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
