भांगरभूंय | प्रतिनिधी
भांगरभूंय । खबरां मेज
पणजीः कोचीन कार्निवव समिती आनी केरळ कोंकणी अकादमी हांच्या जोड पालवान फोर्ट कोची हांगच्या जिल्लो दायज संग्रहालयांत कोंकणी भास मेळावो जालो. केरळ कोंकणी अकादमीचो अध्यक्ष पी एन कृष्णन हाणे ताची येजमानकी चलयली. कोंकणीं मोगी मंडळाचो सचीव विजित कुमार हाणे दिवली पेटोनव मेळाव्याचें उक्तावण केलें. कोचीन कार्नवल समितीचो निमंत्रक सेव्यर बोबन आनी कार्यावळ निमंत्रक सुरूजी हाची ह्या वेळार उलोवपां जालीं. सुरवेक नवनीत कृष्णा के शणै हाणे येवकार गीत सादर केलें.
कोंकणी लेखिका सर्गेस्त एल सुनिताबाय हिचे यादस्तीक कविता गायन सर्त जाली. कोंकणी फुडारी सर्गेस्त बलराज शेट हाचे यादस्तीक वक्तृत्व सर्त जाली. कविता गायन सर्तींत अत्रेय टी एस, नवनीतकृष्णा के वी शणै, अविनंद कृष्णा प्रभू (सब ज्युनियर), ज्ञानदेव जी मल्ल्या, गार्गी एल शेट, गौतमी एल शेट (ज्युनियर), वैष्णवी पी नायक, अपर्णा कृष्णन (सिनियर), पद्मा जी शणै, बाबु आलिंगल, अनिता आर पै हांका इनामां फावो जालीं.
वक्तृत्व सर्तींत ज्ञानदेव जी मल्ल्या, अविनंदा कृष्णा प्रभू, दन्या जी मल्ल्या, सुरेश आर जैतिवंत थारले. ज्येश्ठ साहित्यीक आर एस भास्कर हाणे जैतिवंताक यादस्तीका, प्रमाणपत्रां आनी रोख रक्कम भेटली. सुरवेक अकादमीचे सह कार्यवाहक चंद्रबाबू यू शेटी हांणे येवकार दिलो आनी निमंत्रक के प्रकाशन हाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
