भांगरभूंय | प्रतिनिधी
पणजी : कोकेन ड्रग्ज तस्करी प्रकरणांत मनी लॉंड्रिंगचो दुबाव आशिल्ल्यान सक्तवसुली संचालनालयान (ईडी) झिम्बाब्वेचो नागरीक तारिरो ब्राइटमोर मंगवाना हाका अटक केली. ह्या प्रकरणाची सुरवात १४ एप्रील २०२५ दिसा जाल्ली.
तेन्ना गोंय पोलिसांच्या गुन्यांव फांट्याक चिकोळणा-बोगमोळो हांगा ड्रग्जची तस्करी जातली अशी म्हायती मेळ्ळे. निरीक्षक लक्षी आमोणकार आनी प्रशल नायक देसाय हांच्या नेतृत्वा खाला पंगडान चिकोळणा स्टॅण्ड वाठारांत धाड घालून ४३.२० कोटी रुपयांचें ४.३२ किलो कोकेन जप्त केल्लें.
ह्या प्रकरणांत पुलिसांनी सुरवातेक निबू व्हिन्सेंट, रेश्मा वाडेकार आनी तिचो घोव ह्या तिगां दुबावितांक अटक केल्ली. चवकशेंत रेश्मा वाडेकार विदेशांतल्यान हे ड्रग्ज घेवन आयिल्ल्याचें मुखार आयलें. तशेंच तिका विदेशांत धाडपा खातीर मजत करपी गुजरातच्या चिराग रमेशभाई डुधात हाकाय अटक केली. उपरांत पुलिसांनी तारिरो ब्राइटमोर मंगवाना हाकाय अटक केल्ली. मात उपरांत ताची जामीनाचेर सुटका जाल्ली. आतां मनी लॉंड्रिंगच्या दुबावा वेल्यान ईडीन ताचेर कारवाय केल्या. पयलें वर्ग न्यायालयान ताका २५ ऑगस्टा मेरेन ईडी बंदखण आयकयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
