भांगरभूंय | प्रतिनिधी
रोहन खंवटे : टॅक्सी वेवसायाचेर नियंत्रण जाय
भांगरभूंय । प्रतिनिधी
पणजी : कांय टॅक्सीवाले दादागिरी करतात. कांय लोकांचे दादागिरीक लागून गोंयची बदनामी जाता. कोंबी मारली जाल्यार तातयां कशीं मेळटली? कांय लोकांक लागून जावपी बदनामी आडावपा सयत पर्यटन फुडें व्हरपा खातीर टॅक्सी वेवसायाचेर नियंत्रण जाय. आमदारांनी वोट बँकेचो विचार करिनासतना नियंत्रीत टॅक्सी वेवसायाक तेंको दिवचो, अशी मागणी पर्यटन मंत्री रोहन खंवटे हांणी केली.
पर्यटकांचो आंकडो वाडचो आनी पर्यटन वेवसायाक उबारी मेळची म्हूण सरकाराचे यत्न आसा. पर्यटना खातीर आयटीएमान वांटो घेवपा सयत तरेकवार नवे उपक्रम सरकारान सुरू केल्यात. पर्यटना खातीर टॅक्सी सेवा ही गरजेची गजाल आसा. पर्यटक वाडले जाल्यार टॅक्सीकारांचो वेवसाय वाडटलो. कोंबी मारली जाल्यार तांतयां कशीं मेळटलीं? हाका लागून पर्यटन वाडोवपा खातीर टॅक्सीकारांनी सरकाराक आदार करपाची गरज आसा. पर्यटकांक बरी सेवा मेळपा खातीर नियंत्रीत टॅक्सी वेवसायाची गरज आसा, अशें पर्यटनमंत्री रोहन खंवटे हांणी म्हणलां. अंदूं चित्रपट महोत्सवाचें उक्तावण चित्ररथ मिरवणुकेन जातलें. शिगमो आनी कार्नावाल संस्कृतीचें दर्शन चित्रपट मोगींक जातलें. चित्रपट महोत्सव आसूं वा सेरेंडीपीटी महोत्सव आसूं, पर्यटनाक हाचो लाव जाता. महोत्सव, उपक्रमांचो पर्यटनाक कशें तरेन लाव मेळोवन दिवचो हाचो विचार मुख्यमंत्री बरे तरेन करता, अशें पर्यटन मंत्री रोहन खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
