भांगरभूंय | प्रतिनिधी
रेल्वेच्या पेडणें भुंयारांत उदक सांचिल्लें; खूबश्यो गाडयो केल्ल्यो रद्द
भांगरभूंय । प्रतिनिधी
मडगांवः कोंकण रेल्वे मार्गा वयल्या पेडणेंच्या भुंयांरांतलें देखभाल दुरुस्तीचें काम पुराय जालां. रेल्वे सेवा आदले वरी सुरू जाल्या, अशी म्हायती रेल्वे प्रशासनान दिली.
कोंकण रेल्वे मार्गा वयल्या पेडणें भुंयारांत येवपी उदकाक लागून दीसभरांत खूबश्यो गाडयो रद्द केल्ल्यो. कांय गाडयो दुसऱ्या मार्गान घुंवडायल्ल्यो. रद्द जाल्ल्या गाडयांच्या प्रवाशांचे तिकिटाचे पयशे परतून दितले. जे प्रवासी विवीध स्टेशनांचेर आडकून उरले तांकां बशींतल्यान ज्या स्टेशना वयल्यान गाडी सोडपाची आसा, त्या स्टेशनार व्हरून पावयले, अशी म्हायती कोंकण रेल्वेचे उपप्रबंधक तशेंच वरिश्ठ जनसंवर्क अधिकारी बबन घाटगे हांणी दिल्ली.
कोंकण रेल्वे मार्गा वयल्या पेडणें भुंयेरांतल्या रुळांचेर उदक येवपाची घडणूक बुधवारा फांतोडेर 3 वरांचेर परतून घडली. हाका लागून बुधवारा येरादारी करपी वंदे भारत, जनशताब्दी, मांडवी, सावंतवाडी ते दिवा, मुंबय मंगऱुरू, तेजस एक्सप्रेस ह्यो गाडयो रद्द केल्ल्यो जाल्यार कोंकण कन्या एक्सप्रेस गाडी सावंतवाडी स्टेशना मेरेन चलताली. थंयच्यानूच ती मुंबयचे दिशेन प्रवासाक सुरवात करताली. तशेंच खूबश्यो गाडयो पनवेल, लोंढा मार्गान सोडिल्ल्यो. मडगांवच्यान सुटपी गाडयो कर्नाटकांतल्या मार्गा वयल्यान फुडें चालू दवरिल्ल्यो.
अचकीत फांतोडेर परतून उदक येवपाक लागिल्ल्यान गाडयो रद्द जाल्ल्यान स्टेशनांचेर गाडयांची वाट पळोवपी प्रवाशांची गैरसोय जाली. रेल्वे स्टेशन मास्तर आनी अधिकाऱ्यांची भेट घेवन प्रवाशांनी तांच्या प्रवासाची वेवस्था करपाची मागणी केली. ज्यो गाडयो पुराय तरेन रद्द केल्यात, तातूंतल्यान प्रवास करपी प्रवाश्यांक तिकिटेचे पयशे परतून दितले. जाल्यार ज्यो गाडयो दुसऱ्या मार्गा वयल्यान घुंवडायल्यात, तातूंतल्या प्रवाशांक बशीची आनी रेल्वेची वेवस्था करून लागींच्या स्टेशना मेरेन सोडल्यात, अशें अधिकाऱ्यांनी सांगिल्लें. सावंतवाडी स्टेशना वयल्या प्रवाश्यांक बशीन मडगांवां हाडले आनी मडगांवच्या प्रवासी रेल गाडयेंतल्यान मंगळुरू सोडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
