भांगरभूंय | प्रतिनिधी
काणकोण तालुको गोंयचे शिमेवयल्या सैम सांगातांतल्या दक्षिणेंत लिपिल्लो. गोंय मुक्ती उपरांतय थंय वचपाक येरादारीच्यो साधनसुविधा नाशिल्ल्यो. आयज त्याच तालुक्यांतल्यान कोंकण रेल्वे धांवता. एका तेंपावयलो ल्हानसो गोकर्ण पर्तगाळ जिवोत्तम मठ संवसारांत तालुक्यापरस नामना जोडूंक पावला. फुडल्या पांच वर्सां भितर काणकोण तालुको कलेच्या शिक्षणाचें केंद्रच न्हय मिनी अयोध्या जाल्यार अजाप दिसचें ना. तीच तर ज्येश्ठनीत, वाट फिल्मसिटीची.
हें नाका, तें नाका म्हणपी संवसाराच्या कोनशाक शिंपडिल्ल्या काणकोणांतल्या मुळाव्या नागरिकांक मायभुयेंत वचपाची तान लागल्या आसतली. ज्येश्ठ तालुक्यांत परतल्लेय आसत. आंब्या काजूच्या दोंगरांतलो काणकोण तालुको रानभाज्यांच्या लोकोत्सवान नामना जोडूंक पावलो. कालचे सभापती आतांचे कला आनी संस्कृती मंत्री रमेश तवडकार हांणी मोख दवरल्यार काणकोणांतलो सैम फिल्मसिटी जातलो. गरज आसा फिल्मसिटी पासत पळयल्ले जमनीक वंय घालून घेवपाची.
परिक्षेंत नपास जावप, वेंचणुकेंत अपेस मेळप म्हणल्यार निर्शेणेन घरा बसप ना ही सकारात्मकता गोंयच्या समाजांत वता. तीच तर ज्येश्ठनीत.
पर्तगाळींत संवसारांतल्या कोनशाक पावोवपी डिजिटल यंत्रणेन काणकोणा परस पर्तगाळीक व्हड केलां. सर्वधर्म समभाव पर्तगाळींत हाडपी रामाच्या पुतळ्याची, भोंवतणची नितळसाण राखप ही गांवची लागणूक जावची. नितळसाणींतल्यान भांगर मेळटा हें पर्तगाळीच्या नागरिकांनी वर्सा भितर दाखोवन दिवप गरजेचें. वर्साचे स म्हयने अध्यात्म, अध्यात्म शिक्षण केळयत कलेच्या शिक्षणाचें कुशळटाय केंद्र पर्तगाळींत जावपाक जाय. फिल्मसिटी उबारपाक, फिल्मां करपाक फावो तें मनीसबळाचे बांदावळीक काणकोणांतल्या कला भवनाचो उपेग जावचो. कला गोंयचे मातयेंत आसा, उंचेल्या पावंड्यावयलें उंचेलें तांकीचें आधुनिकतायेतलें कलेचें गोंयकारांक आयजय गोंयांभायर वचचें पडटा. पयलो पावंडो फिल्मा खातीर लागपी शिक्षणाचो, कला अकादमीचें उपकेंद्र काणकोणांतलें कुशळटाय केंद्र जावचें, तीच तर ज्येश्ठनीत.
काणकोणांतली गालजीबाग न्हंय, परशुराम, निराकार आनी हेर देवळां तालुक्यांतल्यो दर्यादेगो भोंवडेकारांक भावपी थळां. पयसो येतना पर्तगाळीचें म्हत्व, झाडां, वड पिंपळाचीं मुळां धुल्लान माखची न्हय ही जतनाय घेवची पडटली. तालुक्यांतल्या ज्येश्ठांनी, बुदवंतांनी तेखातीर येवजण करची, चालीक लावपाक वांटेकार जावचे. तालुक्यांतले सगले गांव अर्थकारणाची भांगरभूंय करतना गांवपण राखपाची लागणूक ते येवजणेंत आसची. गांवपणांतल्यान भावपण जोडप, भावपणांतल्यान मनीसपण, मनीसधर्म शिकोवपाची ज्येश्ठनीत काणकोण तालुक्यान गोंयांक दिवची.
पडंग शेतां सैमीक शेतकाम शिक्षणांतल्यान काणकोण तालुको पांचवोताल्ल करतलीं तो दीस पयस ना. कुळागरां काणकोण तालुक्याची आस्पत, कुळागरांच्या येणावळींतल्यान स्वयंपूर्णा, अन्नपूर्णा घडोवप ही तालुक्याची ज्येश्ठनीत. त्या खिणाची खोस रामाच्या पुतळ्याच्या उक्तावणा वेळार दिसली. शरयू न्हंयचे देगेवयलें सितेचें ल्हानशें देऊळ पर्तगाळी मठांत जावचें. संवसारीक जातना पर्तगाळींत अयोध्या कलेंतल्यान मांडपी, तयार करपी विद्यार्थी तालुक्यांतल्यान घडपाक जाय. काणकोणातले उद्योगीक वसाहतीक संजीवनीची दोंगुल्ली मेळ्ळ्यार नवी दिका तरणाट्यांक दिसतली.
पर्तगाळी मठ म्हणल्यार मुद्रादान, रामनम. आयज रामाच्या पुतळ्या खातीर ती अध्यात्म, पर्यटनभूंय जाल्या. उत्तर गोंयचो देवी लईराईचो गांव तेच शांतीकायेची, अध्यात्माची भूमी जायत व्हय?
उत्तरेंतल्यो दर्यादेगो अशीर जातना गोकर्ण पर्तगाळी मठ अध्यात्म थळ जाता तेन्ना पर्यटनाक नवी दिका दिवपाची संद आसा हें संवसाराक कळ्ळां. काणकोण तालुक्यांत पांचनखेत्री हॉटेलां आसात, पर्यटकय येतात. आगोंद, पाळोळें विदेशी पर्यटकांकय भावतात. दर्यादेगां वांगडा अध्यात्म येता तेन्ना तालुक्याचें व्हडपण, खाशेलपण सांबाळपाची जापसालदारकी ज्येश्ठांनी घेवची. पर्तगाळी अध्यात्माचें सैम सांगांतांतलें पर्यटनकेंद्र जातना दर्यादेगे कडेन वचपी पांयवाटो मेकळ्यो आसच्यो. पंचायत, जिल्लो पंचायत, नगरपालिकेन एकवटान वावुल्ल्यार गोंयच्या पर्यटनाक पर्तगाळींतल्यान वेगळी वाट दिसतली, येणावळय येतली. नव्या उत्सवांची बुन्याद पर्तगाळीच्या अध्यात्म केंद्रांतल्यान घालूंक येता. शारांतले पर्यटनाचे चोमे गांवा कडेन व्हरप, येरादारीची कोयंडी फोडपाची भासाभास पर्तगाळींतल्या परिशदांनी जावची.
नांवाचो तक्टो ना पूण राजपाटण पणजेंतलो परशुरामाचो पुतळो काळखांतलो दिवो जाला. लागसाल्ल्या वाठारांत आंगणांतल्या बाल्कांवांर सेरेंडिपिटी उत्सवांत कलेचो इतिहास, जेवणाखाणाचे मांड येवंक शकतात. थळांतरांतल्यान गोंयकारांची लग्नां फिल्मी रुप घेवंक लागल्यांत. गोंयच्या लग्नांतलें जेवणखाणाचें शिवराक दायज विसरायेर वता तेन्ना पर्तगाळींत दायजाचो इतिहास उक्तो जाता. पुश्टीक गुणधर्म रानभाज्यांतय आसात, पर्तगाळींत त्यो किल्लतात, शिवराकाचें म्हत्व सांगतात. सत्तरी, पेडण्यांतय तें जावंक शकता. पोस्टाच्या तिकीटार गेल्लें पर्तगाळी गोंयांतलें पर्यटनाचें ओल्ड गोवावरी थळ जावचें, नेमावळ, भेस भाशेंतल्यान.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
