भांगरभूंय | प्रतिनिधी
मडगांव : दोन वर्सांच्या भुरग्याक उबारून व्हरपाचो यत्न कोंकण रेल्वेच्या टिसीचे शिटूकसाणेक लागून अपेशी थारलो. तुतारी एक्स्प्रेसींतल्यान प्रवास करपी मनशाची भुरग्या कडेन वागणूक पळोवन दुबाव आयिल्लो टीसी संदेश चव्हाण हांणी मुंबय पुलिसांचे मजतीन भुरग्याची सुटका केली. चवकशे मजगतीं त्या भुरग्याक केईएम हॉस्पिटलांतल्यान चोरिल्ल्याचें समजलें. त्या भुरग्याक मागीर ताच्या पालकांचे सुवादीन केलो.
17 सप्टेंबराक ही घडणूक घडिल्ली. हो दुबावीत दादरच्यान सावंतवाडीक प्रवास करतालो. हे गाडयेंत तिकीट तपासणे खातीर आयिल्ले संदेश चव्हाण हांकां त्या मनशा कडल्यान जे तरेन भुरग्याचो तो सांबाळ करता आनी वागता हाचे वेल्यान दुबाव आयलो. तांणी दुबाविता कडेन चवकशी केली. तेन्ना ताणें तो आपलो पूत आशिल्ल्याचें सांगलें आनी वयले वयर जापो दिवपाक लागलो. उपरांत गाडयेंतल्यान पळपाचो यत्न करपाक लागलो. हाका लागून चव्हाण हांणी प्रवाशांचे मजतीन दुबाविताक गाडयेंतूच आडावन दवरलो. हे घडणुकेची म्हायती मुंबई पुलिसांक दिली. उपरांत ठाणे रेल्वे स्टेशनाचेर रेल्वे पुलिसांनी दुबाविता सयत भुरग्याचो ताबो घेतलो.
पुलिसांनी केल्ले चवकशेंत दुबावीत अमोल उडाळकार (42) हो देवगड- सिंधुदुर्ग रावता. मुंबयच्या केईएम हॉस्पिटलांतल्यान ताणें भुरग्याक चोरून हाडिल्ल्याचें कबूल केलें. हो दोन वर्सांचो भुरगो दिसवड्याचेर काम करपी अनिलकुमार हरिजन हांचो. अनिल हांची घरकान्न अनिता स्वासाच्या दुयेंसाक लागून ऑगस्टाच्यान हॉस्पिटलांत दाखल आसा. हो भुरगो आजी वंदनादेवी हांचे कडेन सांबाळपा दिल्लो. दुबावीत अमोलान ताका खेळयतां अशें सांगून ताका घेवन थंयच्यान पळ काडलो.तीन दिस दुबावीत अमोल त्या भुरग्याक खेळोवपाक थंय येतालो. ह्या प्रकरणांत भोईवाडो पुलीस स्टेशनाचेर अपहरणाची कागाळ नोंद आशिल्ली. पुलिसांनी दुबाविताक अटक केली. भुरग्याक डोंबिवलीच्या बालकल्याण समिती कडेन दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
