भांगरभूंय | प्रतिनिधी
संतोषकुमार झा : पोरणें गोंय, पेडणेंच्या बोगद्यां खातीर १४८६ कोटी मंजूर
मडगांव, प्रतिनिधी : कोंकण रेल्वेन फाटल्या अर्थीक वर्सा ३०१ कोटींचो फायदो मेळयलो. कोंकण रेल्वेच्या १९० पदां खातीर भरतीची अधिसुचोवणी बेगीनूच काडटले. तशेंच पोरणें गोंय आनी पेडणेंच्या बोगद्यांच्या कामां खातीर १४८६ कोटी मंजूर केल्यात, अशी म्हायती कोंकण रेल्वे अध्यक्ष तशेंच वेवस्थापकीय संचालक संतोष झा हांणी दिली.
स्वातंत्र्य दिसा निमतान नवी मुंबय संतोष कुमार झा हांचे हस्तुकीं राष्ट्रीय बावटो हुबयलो. ह्या वेळार झा हांणी कोंकण रेल्वे कर्मचार्यांच्या कामांची तोखणाय केली. तशेंच कोंकण रेल्वेच्या म्हत्त्वाच्या कामगिरी आनी फुडारांतल्या उपक्रमां विशीं म्हायती दिली.
झा हांणी मुखार म्हणलें, कोकण रेल्वेन सर्तीच्या निविदां वरवीं १२०० कोटीं परस चड किमतीचे नवे प्रकल्प येसस्वीपणान पुराय केल्यात. २०२३ -२४ ह्या वर्सा कोंकण रेल्वेन आतां मेरेनचो सगळ्यांत चड ३०१ कोटींचो फायदो जोडला. कोंकण रेल्वेंत १९० पदां खातीरच्या भरतीची अधि सुचवणी बेगीनूच जारी करपाचेंय स्पश्ट केलें. रेल्वे मंत्रालयान प्लॅन हेड ६१ पीएसयू खाला गोंयच्या पोरणें गोंय आनी पेडणें बोगद्याच्या बांधकामा खातीर १४८६ कोटींची नवी इक्विटी मंजूर केल्या.
२०२१ -२२ आनी २०२२-२३ ह्या वर्सा खातीर कर्मचारी कल्याण निधींतल्यान कोंकण रेल्वे कर्मचार्यांच्या भुरग्यां खातीर २०.७८ लाख रुपया रोख पुरस्कार आनी शिष्यवृत्ती म्हणून रेल्वे प्रशासनान वाटले. संवसारीक पर्यावरण दिसा ५ जुनाक, कोकण रेल्वे मार्गार आनी कोंकण रेल्वे विहार हांगा वट्ट ६५४८ रोंपे लायले.
पायाभूत सुविधायांची उदरगत चालीक लागपा खातीर ९ जुलया इंडिया इन्फ्रास्ट्रक्चर फायनान्स कंपनी लिमिटेड आनी कोकण रेल्वे हांचे मदीं म्हत्वाचो सामंजस्य करार केलो. गृह मंत्रालय, राजभास विभाग, नवी दिल्ली हांणी २०२२-२३ ह्या वर्सा उत्कृश्ठ अंमलबजावणी खातीर कोकण रेल्वेच्या मंगळुरु कार्यालयाक क्षेत्रीय राजभास पुरस्कारांत पयली सुवात दिली. कोकण रेल्वे प्रवासी सुरक्षिततायेक म्हत्व दीत रावतले. तशेंच आमी नवो टप्पो हुप्पाक सज्ज आसात. देशाचे उदरगतींत योगदान दितले आनी सगळ्यां खातीर प्रवासाचो अणभव वाडयतले, अशेंय झा हांणी सांगलें.
सौर ऊर्जेक लागून ३८.५७ लाखांचो फायदो
कोकण रेल्वे स्टेशनाचेर सौरऊर्जा यंत्रांनी जानेवारी ते जुलय २०२४ मेरेन ३.१८ लाख युनीट वीज निर्माण केली, जाका लागून वीज बिलांनी ३८.५७ लाखांची बचत जाली.
बेपत्ता २६ भुरग्यांची सुटका !
कोकण रेल्वे मार्गावेल्या गाडयांतल्यान आनी रेल्वे वाठारांतल्यान बेपत्ता २६ जाणांची सुटका केली आनी सुरक्षितपणान तांच्या पालकांक वा चायल्ड हेल्पलायनी कडेन भेटयले.
सात म्हयन्यांनी ११४४४ प्रवासी, ३९५५ मालगाडयो
कोकण रेल्वे मार्गावेल्या कर्नाटकांतल्या ठोकूर हांगच्या गुड्स शेडची उदरगत पुराय जाल्या. जाल्यार उडपी (कर्नाटक), इंदापूर (महाराष्ट्र), वेर्णा (गोंय) हांगा गुड्स शेडचें काम उदरगतीचे वाटेर आसा. जानेवारी ते जुलय २०१४ मेरेन, कोंकण रेल्वेन वट्ट ११४४४ मेल आनी प्रवासी गाडयो आनी ३९५५ मालगाडयो चलयल्यो. कोकण रेल्वे मार्गार वट्ट १८१ विशेश गाडयो येसस्वीपणान चलयल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
