भांगरभूंय | प्रतिनिधी
मडगांवः कोंकण रेल्वे मार्गाचेर एका वर्सात रेल्वे सुरक्षा दळान 1.22 कोटींचें प्रवासी विसरुन गेल्ले सामान तांकां परत केलें. 98 बेपत्ता भुरग्यांक सोडयले आनी 10.71 लाखांचो बेकायदेशीर सोरो जप्त केलो. 65 जाणांचेर कारवाय केली. 4 प्रवाशांचो जीव वाटायलो आनी 40 चोरांक अटक करुन तांचें कडल्यान 48.67 लाखांचो म्हाल जप्त केलो.
कोंकण रेल्वे मार्गाचेर प्रवाशांचो प्रवास चड सोयीस्कर आनी सुरक्षीत करपा खातीर रेल्वे सुरक्षा दळ वावुरता. शेंणिल्लें सामान सोदून परत करपा पसून ते भुरग्यांक सोदून तांच्या पालकांच्या ताब्यांत दिवपा मेरेनच्या प्रकरणांनी रेल्वे सुरक्षा दळांक येस आयलां.
‘ऑपरेशन अमानत’ खाला आरपीएफान 252 प्रवाशांचे विसरुन गेल्ले सामान तांकां परत केलें. ह्या सामानांचे वट्ट मोल 1 कोटी 22 लाख 48 हजार रुपया आसा. रेल्वे पुलिसांच्या ह्या प्रामाणीकपणाक लागून प्रवाशांचो रेल्वेचेर आशिल्लो विस्वास वाडला.
98 भुरग्यांक वाटायले
आरपीएफान रेल्वे स्टेशनांचेर वा रेल्वेंन एकटेंच मेळिल्ल्या 98 नेण्ट्यां भुरग्यांक वाटायले आनी तांच्या पालकांच्या ताब्यांत दिलें. ‘ऑपरेशन नन्हे फरिश्ते’ खाला ह्या भुरग्यांचे शोशण आडोवन तांकां पुनर्वसना खातीर ‘चायल्ड हेल्पलायन’ कडेन दिले.
बेकायदेशीर सोऱ्याचे विक्री आड कारवाय
कोंकण रेल्वेंतल्यान बेकायदेशीर सोऱ्याची तस्करी बंद करपा खातीर आरपीएफान ‘ऑपरेशन सतर्क’ सुरू केले. हातूंत 10.71 लाखांच्यो 6,877 सोऱ्याच्यो बाटल्यो जप्त केल्यात. ह्या प्रकरणांत 65 जाणांक अटक केल्या. प्रवाशांचे सामान चोरपी 40 गुन्यांवकारांक अटक करून 48.67 लाखांचो म्हास जप्त केलो. ‘जीवन रक्षा’ उपक्रमा खाला सतर्क जवानांनी 4 प्रवाशांचे जीव वाटायले. रेल्वे कायद्याच्या कलम 141 खाला चेन पुलिंग (ACP) आनी हेर नेमांचें उल्लंघन केल्ल्यान 222 जाणांचेर कारवाय केल्या. ही कारवाय अशींत चालू उरतली अशें कोंकण रेल्वे प्रशासनान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
