कोंकणी हीच गोंयची राजभास

भांगरभूंय | प्रतिनिधी

भाई मावजो हांकां कोंकणी मोगींचो तेंको

भांगरभूंय । प्रतिनिधी

पणजीः राजभास कायद्यांत मराठी नाका ह्या विधाना वयल्यान टिकेचे धनी जावपी दामोदर (भाई) मावजो हांचें समर्थन करून तांकां तेंको दिवपा खातीर कोंकणी मोगी एकठांय आयल्यात. भाई मावजो उलयला तें सारकें, कोंकणी हीच गोंयची राजभास अशें स्पष्ट मत कोकणी मोगींनी मांडलां.

सरकारी वेव्हारांत फक्त कोंकणीचोच वापर जावचो. ते खातीर दुरुस्ती जावपाक जाय. मराठी भाशेक विरोध नासलो तरी राजभास कायद्यांत तिचो उल्लेख आसपाक जायना, अशें विधान भाई मावजो हांणी ‘भांगरभूंय’ कडेन उलयतना केल्लें.

मराठी ही पोरणी आनी व्हड भास. पुराय 9-10 कोटींची लोकसंख्या आशिल्ल्या महाराष्ट्रांत ती उलयतात. तातूंत गोंया सारके 40 जिल्हे आसात. ल्हान गोंयांत मराठी खातीर राजभाशेचो हट्ट धरप हातूंत अर्थ ना, अशें ज्येष्ठ साहित्यीक महाबळेश्वर सैल हांणी सांगलें.

कोंकणी आमची आवयभास, तातूंत कांयच दुमत ना. तरी लेगीत ती शेंकड्यांनी वर्सां चेपून उरिल्ली. ती वयर सरची हे खातीर आमी यत्न करतात, पूण मराठी मोगींनी कोंकणीक उणाक लेखून कुशीक दवरपाचें चिंतूंक जायना, असो सल्लो सैल हांणी दिला.

मराठी लोकांनी कोंकणी उणाक लेखिल्ल्यान कोंकणीक आत्मविस्वास असो मेळूंक ना. तरी लेगीत तातूंल्यान वयर सरून आमी कोंकणी मुखार व्हेल्या. मराठी मोगींनी आनी समेस्त गोंयकारांनी ती वयर सरची हे खातीर यत्न करपाक जाय. मराठी विशीं दुस्वास ना आनी ती नाका अशें आमचें म्हणणें ना. कोकणीची स्वंतत्रपणान व्हडविकाय जावपाक जाय आनी तिची उदरगत करपाक जाय. जे लोक हे खातीर यत्न करतात तांचेर टिका करचे परस उरफाटे तांकां उर्बा दिवपाक जाय, अशें मत सैल हांणी मांडलां.

भाई मावजो उलयला ते सारकें. खंयच्याच राज्यांनी दुसरे भाशेक अशे तरेचो दर्जो दिवंक ना, अशें मत जाणकार आनी ‘भांगरभूंय’चे आदले संपादक दामोदर घाणेकार हांणी उक्तायलें.

भाई मावजो हांचेर टिका करपी फेसबुकार कोंकणी सहभास म्हूण बोवाळ घालतात, तांका सांगपांक सोदतां, कोंकणी ही मराठीची सहभास न्हय. मराठीचो वापर पत्रवेव्हारान करूं येता, पूण ती राजभास जावपाक शकना. कोंकणी ही एकूच राजभास, अशें घाणेकार हांणी स्पश्ट केलें.

कोंकणी खातीर हें करतले तें करतले हें सांगून सरकारान चलयल्लीं संवगां बंद करचीं. सगळ्यांत पयलीं सरकारी कर्मचाऱ्यांक ट्रेनींग दियात. चर्चील आलेमांव राजभास मंत्री आसलों तेन्ना 40 दिसां खातीर 40- 50 कर्मचाऱ्यांचे तीन वरांचो वर्ग घेतले आनी तांकां कोंकणींत प्रशिक्षण दिल्लें. हे खातीर पगारवाड आनी हेर गजालींचें हांयस दाखयल्लें, पूण तें जालेंच ना, अशें घाणेकार हांणी सांगलें. कोकणी भास सरकारी पांवड्यार पयली पोलिस स्टेशनात सुरू करची. लोक आपल्यो कागळी कोकणीत सांगता थयसर दुसरो ती इंग्रजीत अणकार करून तो टायप करता. तो एफआयार कोकणीतच करचो, असो सल्लो घाणेकार हांणी दिला.