भांगरभूंय | प्रतिनिधी
साहित्य अकादेमी वतीन पर्वरे आयोजन
भांगरभूंय । खबरां मेज
पणजी : नवी दिल्लीच्या साहित्य अकादेमीन पर्वरे टीएसकेकेच्या सभाघरांत 3 दिसांची कोंकणी-हिंदी अणकार कार्यशाळा आयोजीत केल्ली. अखील भारतीय कोंकणी परिशद आनी थॉमस स्टीफन्स कोंकणी केंद्र (टीएसकेके) हांच्या जोड पालवान 21, 22 आनी 23 मार्चाक ही कार्यशाळा जाली.
कार्यशाळेंत 21 साहित्य अकादेमी पुरस्कार जैतिवंत कोंकणी कवींच्या दरेकी पांच कवितांचो हिंदींत अणकार जालो. डॉ. रमिता गुरव आनी डॉ. आशा गहलोत हे तज्ञ आशिल्ले. तांणी अणकारीत कवितांचो नियाळ घेतलो आनी पुराय कार्यशाळेंत अनुवादकांक मार्गदर्शन केलें.
एच. एम. पर्नाल आनी मेल्वीन रॉड्रिगीज हांणी अनुवादकांक अणकारांची बारीकसाण सांगून म्हात्वाचें मार्गदर्शन केलें.
कार्यशाळेच्या पयल्या दिसा उक्तावण सुवाळो जालो. ह्या सुवाळ्याक साहित्य अकादेमीच्या कोंकणी सल्लागार मंडळाचे निमंत्रक मेल्वीन रॉड्रिगीज, टीएसकेकेचे संचालक पांडुरंग फळदेसाय आनी एआयकेपीचे भांडारी हेन्री मेंडोंका हांणी उलोवपां केलीं. तांणी अनुवादक म्हूण आपले अणभव सांगले आनी अनुवादकांक आनी कार्यशाळेक परबीं भेटयलीं. ह्या वेळार टीएसकेकेचे फादर जुझे सिल्वेरा हाजीर आशिल्ले. हो कविता झेलो साहित्य अकादेमी बेगिनूच उजवाडाक हाडटली. ताचो फुडें वेगवेगळ्या अनुसुचीत भारतीय भाशांनी अणकार जातलो, अशें साहित्य अकादेमीच्या कोंकणी सल्लागार मंडळाचे निमंत्रक मेल्वीन रॉड्रिगीज हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
