कोंकणी साहित्य संमेलनाच्या लोगोचें लोकार्पण

भांगरभूंय | प्रतिनिधी

लिट फेस्ट आमकां सदांच भास आनी साहित्याच्या विविधतायेची परब मनोवपाची संद दिता. कारण वेगवेगळ्या प्रदेशांतले लेखक संमेलनांत वांटो घेतात आनी आपलीं कृती आनी कल्पना वांट्टात. अखील भारतीय कोंकणी परिशद, जी कुमटाचे पुरस्कर्ते माधव मंजुनाथ शानभाग हांणी 1939 वर्सा स्थापन केल्ली, तिणें आतां मेरेन हेर कार्यावळीं वांगडाच 24 अखिल भारतीय कोंकणी साहित्य परिशदो घडोवन हाडल्यात. 25 वी अ. भा. कोंकणी साहित्य परिशद मंगळूरांत संवसारीक कोंकणी केंद्र, शक्तिनगरांत जातली. सुमार 800 प्रतिनिधी वेगवेगळ्या वाठारांतल्यान हाजीर रावपाची अपेक्षा आसा. विद्यार्थ्यांक प्रतिनिधी शुल्काचेर खाशेली सवलत दिल्या आनी भायल्यान येवपी सगल्या प्रतिनिधीं खातीर रावपाची वेवस्था केल्या. प्रतिनिधींक 2 दीस कोंकणी जेवणाची रुच घेवंक मेळटली. प्रतिनिधीं खातीर ऑनलायन नोंदणी उपलब्ध आसा, अशी म्हायती टायटस नोरोन्हा (कवी, राहुल एडव्हर्टायझर्साचे सीईओ) हांणी दिली. काल संवसारीक कोंकणी केंद्राच्या सेंट्रल हॉलांत जाल्ल्या लोगो लाँचिंग सुवाळ्यांत ते उलयताले.
ज्येश्ठ पत्रकार, राखणो कोंकणी सातोळ्याचे आदले संपादक आनी 1974 वर्सा कोंकणी भाशा मंडळ, कर्नाटक स्थापन करपी मुखेल व्यक्ती फादर मार्क वाल्डर हांणी रिमोट दामून लोगोचें लोकार्पण केलें. मंगळुरूच्या सेंट आलोयसियस कॉलेजींतल्या कोंकणी इन्स्टिट्यूटचे संयोजक पिंटो वामंजूर हांणी हो लोगो डिझायन केला.
संवसारीक कोंकणी केंद्राचे अध्यक्ष नंदगोपाल शेनॉय हांणी संमेलन पत्रक आनी साहित्य अकादेमीचो पुरस्कार जैतिवंत लेखक गोकुळदास प्रभुन प्रतिनिधी पासांचें उक्तावण केलें. आॅल्विन डिसोझा, पनीर अध्यक्ष कॅथलिक सभा, मंगळूर हांणी क्यूआर कोड स्कॅन करून ऑनलायन नोंदणीचें उक्तावण केलें. अ. भा. कोंकणी परिशदेचे अध्यक्ष अरुण उभयकार हाजीर आशिल्ले.
येवकार समितीचे वावुरपी अध्यक्ष एच एम पेर्नलान सोयऱ्यांक आनी मेळाव्याक येवकार दिलो. नवी दिल्लीच्या साहित्य अकादेमींतल्या कार्यकारी मंडळाचो वांगडी आनी कोंकणी सल्लागार मंडळाचो निमंत्रक मॅल्वीन राॅड्रीगाश हांणी सुत्रसंचालन केलें. विश्व कोंकणी केंद्राचे सीईओ गुरुदत्त बंटवाळकर हांणी उपकार मानले.