कोंकणी साक्षपत्राचें ३५० वें पर्व मनयलें

भांगरभूंय | प्रतिनिधी

भांगरभूंय । खबरां मेज
पणजी : अनुग्रह चॅरिटेबल ट्रस्ट आनी आपु भट- रंग भट- विनायक पंडित स्मारक समितीन मेळून ‘होर्तूस सायाह्न’- कोंकणी साक्षपत्राच्या ३५० व्या वर्साचें पर्व हालींच कोचींत मनयलें.
सतराव्या शेंकड्यांत कोचीचे डच कमांडराच्या निर्देशा वयल्यान रचिल्ले १२ खंडांचे ‘होर्तूस इंडिकूस मलबारिकूस’ सस्यशास्त्र ब्रहद् ग्रंथांत आपु भट, रंग भट आनी विनायक पंडित ह्या कोंकणी वैद्यांनी दोन वर्सां काम करून तांणी कसलें योगदान ह्या वखदी झाडांच्या कोशाक दिलें ताचें देवनागरी कोंकणी प्रमाणपत्र बरोवून ताचेर स्वताची सही केल्ली. तें पुस्तकांत आसा. तशेंच वनस्पतीचीं कोंकणी नांवां आसात.

कोंकणी लेखक, वावुरपी एस. रामकृष्ण किणी हांणी होर्तूसाचेर आधारित प्रस्नमंजुषा कार्यावळ ‘होर्तूस प्रश्नोत्तरी’ आयोजीत केली. उपरांत कोंकणी कवी आनी साहित्यकार एन बालकृष्ण मल्या हांणी बरयिल्लें आनी टीडीएलपी शाळेंतली कोंकणी अध्यापक श्रीमती सरस्वती एस. प्रभु हांच्या मार्गदर्शना खाला भुरग्यांनी सादर केल्ली कोंकणी लघुनाटक ‘कोंकणी साक्षपत्र’ केलें.
मागीर, प्रार्थना, स्वागत गीत गायन जालें. अनुग्रह चॅरिटेबल ट्रस्टाचे सचिव एन. मुरळीधर पै हांच्या अध्यक्षपणा खाला नामनेच्या व्यक्तींच्या हाजेरींत भौशीक बसका जाली. ए. आर. वी स्मारक समितीचे संयोजक एन. रमेश कुमार पै हांणी येवकार दिलो. उपरांत मुरळीधर पै हांचें उलोवप जालें.

कोंकणी कवी, लेखक शरतचंद्र शणै हांणी ‘होर्तूसां’तल्या कोंकणी प्रमाणपत्राच्या 350 व्या वर्साची वळख करून दिली.
मुखेल सोयरे तिरुवनंतपुरम दूरदर्शन केंद्राचे सह संचालक डॉ. पी. आर. हरीन्द्र शर्मा हजर आशिल्ले. तांणी दिवली पेटवून कार्यक्रमाचें उक्तावण केलें. उपरांत, एन बालकृष्ण मल्या हांणी बरयल्लें ‘होर्तूस मलबारीक्कूसुं कोंकणीगळुडे पङ्गुं’ ह्या मलयाळम पुस्तकाची तिसरी आवृत्ती आनी डॉ. प्रतिमा आशर हांच्या ‘होर्तूस मलबारीकस अॅण्ड दी कंट्रिब्यूशन ऑफ कोंकणीस’ ह्या इंग्लीश अणकाराची दुसरी आवृत्ती मुखेल सोयऱ्यांचे हस्तुकी प्रकाशित जाली.

कोंकणी साहित्यकार आर. एस. भास्कर आनी इतिहासकार, स्तंभलेखिका डॉ. प्रतिमा आशर हाणी विचार मांडले. प्रश्नोत्तरी सर्तींत जैतिवंत जाल्ल्यांक आनी नाटकांत अभिनय केल्ल्या भुरग्यांक इनामां भेटयलीं. प्रो. के. एन. आर. भट हांणी समेस्ताचें उपकार मानले.