भांगरभूंय | प्रतिनिधी
पणजी ः कोंकणी गीतांक साता समुद्रा पलतडीं पावोवपी मंगळुरूचे संगीतकार, गायक एरिक ओझारियो (७६) आयज दनपरां संवसाराक अंतरले. तांचेर फादर मुल्लेर हॉस्पिटलांत किडनी दुयेंसाचेर उपचार चलताले.
एरीक अलेक्झांडर ओझारीयो हांचो जल्म १८ मे १९४९ दिसा जेप्पू- मंगळुरूंत जालो. कोंकणी संगीतकार, संस्कृतीक वावुरपी आनी कोंकणी भाशकां खातीर वावुरपी म्हूण तांणी खूब वावर केला. मांड- सोभाण हे संस्थे वरवीं तांणी कोंकणी गितां, नाच, संगीत सगले कडेन पावयलें. कलांगण ही संस्थाय तांणी कोंकणी परंपरा, संस्कृती फुडल्या पिळग्यां मेरेन पावची म्हूण स्थापन केली.
कर्नाटकांतल्या शाळांनी कोंकणी विशय म्हूण लागचो हे खातीर बरेच यत्न केले. सैमाचोय तांकां मोग आशिल्लो. मंगळुरुंत झाडां कांपलीं तेन्ना तांणी ताचे आड मोहीम सुरू केली. ढहश खपवशषरींळसरलश्रश र्उीीीरवशी ही तांची २०१४ त उजवाडाक आयिल्ली आपजीण.
तांकां १९९३ त कर्नाटक राज्योत्सव पुरस्कार, कोंकणी रत्न, कोंकणी कलासम्राट, कर्नाटक कोंकणी साहित्य अकादेमी पुरस्कार, दायजीदुबय, कोंकणी नाटक सभा अशे जायते पुरस्कार फावो जाल्यात.
तांचे फाटल्यान गायिका आशिल्ली घरकान्न जॉयस फोंतेस, धूव डॉ. रश्मी किरण, पूत रितेश किरण असो परिवार आसा. संगीतकार आल्विन फर्नांडीस हो तांचो जांवय.
वज्रां मोतयां, साळकाची पांकळी, गांव गो चेडवा, चिंता सदां, सुर्याची किरणां, काळीज गाज, डायना बाय, आयज कोणी येवचो जाला…. अशीं तांचीं बरींच गितां म्होवाळ चालीं खातीर गाजल्यांत. अनुप जलोठा सयत बर्याच नामनेच्या गायकांनी तांची पदां गायल्यांत. तांचे बरेच अल्बम प्रसिद्ध आसात.
तांच्या मरणाचेर कर्नाटक, महाराष्ट्र आनी गोंयच्या कोंकणी मोगी, संगीत मोगींनी दुख्ख उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
