भांगरभूंय | प्रतिनिधी
पणजी, खबरां मेजः कोंकणी शिक्षण, साहित्य, संघटन, सहकार आदी मळांचेर भोव मोलादीक योगदान दिल्ले जेश्ठ शिक्षक आनी आदले मुख्याध्यापक जॉन मॅन्डोन्सा संवसाराक अंतरले. तांच्या मरणाचेर कोंकणी भाशा मंडळ आनी अखिल भारतीय कोंकणी परिशदेन दुख्ख परगटायलां.
जॉन मॅन्डोन्सा हांणी कोंकणी शिक्षणाच्या मळार विशेश योगदान दिल्लें. गोंय शालान्त मंडळाच्या कोंकणी अभ्यास मंडळाचे वांगडी म्हूण तांणी साबार वर्सां वावर केला. मंडळान तयार केल्ल्या साबार पाठ्यपुस्तकांच्या निर्मितींत तांचो मुखेल वांटो आशिल्लो. कोंकणी भाशा मंडळान 2007 वर्सा फेलिक्स कार्दोज शिक्षक पुरस्कार भेटोवन तांच्या वावराचो भोवमान केल्लो. कोंकणी भाशा मंडळाचे ते निमाणे मेरेन सक्रीय वांगडी आशिल्ले. घाट माथ्यावेल्या आनी गोंयच्या कोंकणी समाजा मदीं पूल बांदपाचें काम तांणी तळमळीन केल्लें. समतेचे ते खर पुरस्कर्ते आशिल्ले.
तांच्या मरणाचेर कोंकणी भाशा मंडळाची अध्यक्ष रत्नमाला दिवकार, सचीव मंगलदास भट आनी अखिल भारतीय कोंकणी परिशदेचे कार्यकारी अध्यक्ष चेतन आचार्य हाणी तांकां आर्गां ओपल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
