‘कोंकणी’ वळख सांबाळपी शक्त

भांगरभूंय | प्रतिनिधी

कन्नड साहित्यीक जयंत कायकीणी हांचें म्हणणें

संस्कृती तिगोवपाक साहित्य गरजेचें

25 व्या युवा कोंकणी साहित्य संमेलनाचें उक्तावण

भांगरभूंय । प्रतिनिधी

वाळपय : कोंकणी युवा साहित्य ही फकत भास न्हय, जाल्यार आमची वळख आनी संस्कृती सांबाळपी शक्त आसा. अश्या साहित्य संमेलनांक लागून नव्या, सर्जनशील आनी जापसालदार साहित्यिकांची पिळगी घडयता. हेच खातीर तरणाट्यांक माची दिवपी ही चळवळ सेगीत वाडपाक जाय, अशें नामनेचे कन्नड कोंकणी साहित्यीक जयंत कायकीणी हांणी सांगलें.

ठाणे सत्तरी आयोजीत केल्ल्या गोवा कोंकणी अकादेमी पणजी, साहित्य मंथन सत्तरी आनी पीएम सर्गेस्त हिरोजीराव बाबुराव देसाय सरकारी माध्यमीक विद्यालय ठाणे हांच्या जोडपालवान 25 व्या युवा कोंकणी साहित्य संमेलनाच्या उक्तावण कार्यावळींत कायकीणी मुखेल सोयरे म्हूण उलयताले.

ह्या वेळार माचयेर संमेलन अध्यक्ष डॉ. हेमंत अय्या, गोवा कोंकणी अकादेमीचे अध्यक्ष डॉ. पूर्णानंद च्यारी, अकादेमीचे सचीव पराग नगरर्सेकार, समितीचे कार्याध्यक्ष गोपीनाथ गांव, येवकार अध्यक्ष काशिनाथ नायक, फटगो गांवकार, केपें म्हाविद्यालयाचे प्राचार्य भास्कर नायक, दीपराज सातार्डेंकार आनी हेर मानेस्त हाजीर आशिल्ले.

भारतीय संस्कृती ही आमचे आचार, विचार आनी वागणुकेंतल्यान सेगीत जिवीत रावता. ती तिगोवन दवरतले जाल्यार, साहित्य हें प्रभावी माध्यम थारता. आयच्या काळांत नवे पिळगेंतल्या लेखकांनी आपले लेखणींतल्यान संस्कृतीचीं मुल्यां, परंपरा आनी समाजाचें वास्तव मांडप खूब गरजेचें आसा. आमच्या विचारांतल्यान आनी लेखणींतल्या समाज घडटा, ही जाणीव दवरून साहित्य निर्मिती जायत रावची, हीच अपेक्षा आसा. साहित्य म्हणजे हारसो नासून तें जनेल आसता. ज्या जनेलांतल्यांन पुराय विश्व आस्पावता. साहित्यीक हो पारदर्शी आसचो. साहित्यीकाक जात, पात, भेद भाव कायंच  लागना.  तो दोतोरावरी आसचो. जो पेशंटाचो जीव वाटोवपाचें चिंतता, ताका गरीब श्रीमंत लागना. ताचेखातीर तो पेशंटच आसता. साहित्यिकान तसोच आसचो, अशें जयंत कायकीणी हांणी सांगलें.

दरेकल्याची भास आनी चालीरिती वेगवेगळ्यो आसल्यो तरी लेखक आपले लेखणींतल्यान साहित्य निर्मिती करता. मनशान आपले विचारशैलींतल्यान समृद्ध, जिवीत आशिल्लें साहित्य निर्माण करपाक जाय. लेखनांत वैचारीक भुमिका, भावना, सोंशिकसाण आनी चिंतनशिलता आसप गरजेचें आसा. लेखन हें फक्त स्वता पुरतें उरनासतना समाजाक उपेगी पडपी आसपाक जाय, अशें कायकीणी हांणी स्पश्ट केलें.

आपलें प्रांत वेगळे आसले तरीय दरेकल्यान आपले भाशेचो अभिमान बाळगुपाक जाय. भारतीय संस्कृती तिगोवन दवरचे खातीर आपल्या आचार- विचारांतल्यान साहित्य निर्मिती जावपाक जाय. नवे, सक्षम साहित्यीक घडोवपा खातीर अशे तरेची साहित्य संमेलनां म्हत्वाची थारतात. साहित्य म्हणल्यार दिसपट्टे जिणेंतले अणभव, मनांतल्यो भावना आनी विचार जे कविता लेखन आनी सर्जनशिलतेंतल्यान व्यक्त जातात. आयच्या धांवपळीच्या युगांत दरेकल्याक प्रत्यक्ष नाटक वा लेखन अणभवपाक वेळ मेळना, तरी लेगीत युवा पिळगेक साहित्या कडेन जोडपा खातीर अश्या संमेलनांचें आयोजन फायद्याचें थारता, अशें कायकीणी हांणी सांगलें.

डॉ. हेमंत अय्या हांणी सांगलें, आयज आमी ज्या पांवड्याचेर पावल्यात ताच्या फाटल्यान खूब जाणांचो मोलादीक आदार आसा. एका वयर सरपी लेखकाक अणभवी लेखकान दिल्ले मजतीचो हात ताका फुडें व्हरपाक म्हत्वाचो थारता. नव्याचें भान, फुडल्या समस्यांची जाणीव आनी ते लेखणींतल्यान व्यक्त करपाची ताकद लेखकाक मेळपाक जाय, अशें तांणी सांगलें.

कोंकणी आसूं वा मराठी, भारतीय संस्कृतीचो सांबाळ करप ही आमची सामुहीक जापसालदारकी आसा. गोंयांतल्या खूबश्या कोंकणी लेखकांनी आपले लेखणींतल्यान साहित्य निर्मिती करून गिरेस्त परंपरा सांबाळ्ळ्या. साहित्यीक संघर्श एके पिळगे कडल्यान दुसरे पिळगे कडेन पावयता. ते खातीर दरेकल्यान आपली जापसालदारकी वळखुवप गरजेचें आसा. बरे विचार, मनन आनी चिंतन काळाची गरज आसा. आयच्या धांवपळीच्या कालांत बदलपी चालीरितीं कडेन गांभिर्यान पळोवपाक जाय, अशें अय्या हांणी सांगलें. युवा पिळगेन समाजांत व्हांवून वचनासतना संवेदनशील अभिव्यक्ती घडोवची आनी आपली समाजीक जापसालदारकी वळखुची, असो तांणी उलो मारलो.

गंवगिऱ्या वाठारांत साहित्य परतून कशें जिवीत दवरपाक मेळटलें, ताचें संवर्धन कशें करपाक मेळटलें, परंपरा कश्यो सांबाळपाक मेळटल्यो आनी वाचकवर्ग कसो वाडोवपाक मेळटलो, हाचे कडल्यान सगल्यांनी लक्ष दिवपाची गरज आसा, अशेंय अय्या हांणी स्पश्ट केलें.

डॉ. पूर्णानंद च्यारी हांणी प्रास्तावीक करतना सांगलें, आयज तरणाट्यांचो दीस आसा. आयज 25 वें युवा साहित्य संमेलन. ह्या 25 वर्सांत आमी कितें जोडलें, कितें वगडायलें आनी कितें व्हरतले भुतकाळांतल्यान वर्तमान काळांत? ह्या प्रवासांत गोवा कोंकणी अकादेमी तरणाट्यां खातीर साहित्यिकां खातीर आनी संशोधनाची, कोश वेवसाया कडेन वेगवेगळ्यो येवजण्यो आयोजीत केल्या. ह्या साहित्य संमेलनांतल्यान युवा उर्जा निर्माण जावचे खातीर, नवे लेखक, साहित्य तयार जावचे खातीर फायद्याच्यो थारतल्यो.

ह्या संमेलनांत लाडको कुडतरकार हांचें ‘सैम उलो’ (प्रकाशक गोवा कोंकणी अकादेमी),  शिवाजी राम ओझरेकार हांचें ‘सुशेगाद डॉट कॉम’ (प्रकाशक- बालमित्र प्रकाशन),  सविता गिरोडकार हांचो ‘अभिव्यक्त’ कविता संग्रह (प्रकाशक-आमचें दायज),  काशिनाथ नायक हांचो ‘स्वमन’ निबंद संग्रह (प्रकाशक- संजना प्रकाशन) आनी गोपीनाथ गांवस हांचें ‘सुत्रनिवेदन’ (प्रकाशक- आमचें जायज), अशा वट्ट पांच पुस्तकांचें मानेस्तांचे हस्तुकीं लोकार्पण जालें.

संमेलनाच्या निमतान दर वर्सा दितात तो गोवा कोंकणी अकादेमीचो युवा पुरस्कार दीपराज सातार्डेंकार हांकां मानेस्तांचे हस्तुकीं भेटयलो. तशेंच केपें म्हाविद्यालयाचे प्राचार्य भास्कर नायक हांचो शाल, नाल्ल आनी यादस्तीक चिन्न दिवन सत्कार केलो.

सुरवेक मालें पेटोवन आनी येवकार गितान संमेलनाचें उक्तावण जालें. तशेंच धनगर लोकनाचान संमेलनाचें दबाज्यान मिरवणुकेन उक्तावण जालें. ह्या वेळार गोंयभरांतल्यो विवीध शाळा, माध्यमीक आनी म्हाविद्यालयांतले विद्यार्थी, साहित्यीक, लेखक आनी हेरांनी व्हड संख्येन हाजेरी लायिल्ली.

दोन दीस चलपी ह्या साहित्य संमेलनांत विवीध कार्यावळींचें आनी सत्रांचें आयोजन केलां. ह्या वेळार गोपीनाथ गांवस, काशिनाथ नायक हांणी आपले विचार मांडले.

अविता गांवकार आनी गोरख शिरसाट हांणी सुत्रसंचालन केलें. प्रशांत नायक हांणी उपकार मानले. ते उपरांत विवीध सत्रांक सुरवात जाली.

ह्या वेळार सत्तरींतल्या लेखकांच्या पुस्तकांचें प्रदर्शन मांडिल्लें. ह्या खास पुस्तक प्रदर्शनाचें उक्तावण मानेस्तांच्या हस्तुकीं केलें. तशेंच लोक बाजाराचेंय उक्तावण मानेस्तांच्या हस्तुकीं केंलें.