भांगरभूंय | प्रतिनिधी
-गोंयच्या फुडारा खातीर सरकारान निर्णय घेवचोः एदुआर्द फालेरोपणजीः कोंकणी रोमी लिपीक सरकारान मान्यताय दिवची न्हय. रोमीक मान्यताय मेळ्ळी जाल्यार हाचे गंभीर परिणाम पळोवपाक मेळटले आनी आमच्या भुरग्यांचो फुडार काळखांत वतलो. पुर्तुगेजांनी संस्कृती बरोबर कोंकणी भास लेगीत काबार केल्ली. देखून कोकणी रोमी हांका मान्यताय दिवपाक जायना, अशी मागणी आदले केंद्रीय मंत्री एदुआर्द फालेरो हांणी केल्या.
पर्वरी विधानसभा संकुलात घडोवन हाडिल्ले गोंय विधीकार दिसा निमतान उक्त्या माचयेचेर आपली मागणी सरकारा मुखार आदले केंद्रीय मंत्री फालेरो हांणी केल्या. ह्या वेळार उलयतना फालेरो हांणी सांगलें, कोंकणी ही रोमी लीपी करप सामकें चुकीचे आनी विनाशकारी प्रकार.
कोंकणी भास ही हेर भाशें भशेन संस्कृतांतल्यान जल्माक आयल्या. पूण जेन्ना पुर्तुगेज गोंयांत आयले उपरांत तांणी आपली हुकूमशाय येतकच आमची संस्कृती काबार करून उडयली. कोंकणीचो तांणी स्विकार करुंक ना आनी फक्त पुर्तुगेज भाशेचो वापर केलो. हे प्रक्रियेंत कॅथलीक इगर्जीचो वांटो आसलो आनी कालांतरान हाचो कोंकणी भाशेत बदल जालो. देखून आमी आतां कोंकणी रोमी वापरल्यार आमी संकश्टांत येतले, अशी भिरांत फालेरो हांणी उक्तायल्या.
विदेशी हुकूमशाह आशिल्ल्या राजवटी आड राष्ट्रीय भाशे खातीर चळवळ सुरू जाली आनी ही चळवळ आजय पुराय देशभर वाडत चल्ल्या. देखून कोंकणी रोमीक राष्ट्रीय पांवड्यार मान्यताय मेळपाक शकना. आपूण भाशण दिना, फक्त सरकाराचे लक्ष ओडपाक सोदता. जर रोमीक मान्यताय दिली जाल्यार आमच्या भुरग्यांचो फुडार काळखांत उरतलो. फक्त ल्हान समुदाय हे लिपीचो वापर करतात, असो आरोप फालेरो हांणी करून आमच्या भुरग्यांच्या फुडारा खातीर कोंकणी रोमी लिपीक मान्यताय दिवची न्हय अशी मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
