भांगरभूंय | प्रतिनिधी
पणजी : कोंकणी राजभास जाल्ल्यान गोंयकार मनशाक नोकरेंत प्राधान्य मेळपाक लागलां. शिक्षण तशेंच उदरगतीक लेगीत कोंकणीक लागून उर्बा मेळ्या, अशें प्रा. हनुमंत चोपडेकार हांणी सांगलें. कोंकणी अकादेमींत बुधवारा राजभास दिसाची कार्यावळ जाली. हे कार्यावळीत तांचे भाशण जालें.
4 फेब्रुवारी 1987 हे दिसा राजभास कायदो अस्तित्वांत आयलो. बुधवारा सगल्याक राजभास दिसाच्यो कार्यावळी जाल्यो. कोंकणी अकादेमींत जाल्ले कार्यावळींत प्रा. हनुमंत चोपडेकार हांचे मुखेल भाशण जालें. फादर मावजीन आतायद, राजभास संचालनालयाचे उपसंचालक अनिल सावंत, अकादेमीचे वांगडी सचीव पराग नगर्सेकार, कोंकणी अकादेमीचे अध्यक्ष प्रा. पूर्णानंद च्यारी, उपाध्यक्ष रमेश घाडी हाजीर आशिल्ले.
प्रा. हनुमंत चोपडेकार हांणी कोंकणी राजभाशे खातीर जाल्ले आंदोलनाच्या इतिहासाची म्हायती दिली. 19 डिसेंबर 1961 दिसा पुर्तुगेज राजवटींतल्यान गोंय मुक्त जाले. हे पयलीं लेगीत मराठी साहित्य संमेलनात कोकणी ही मराठीची बोली आसा, असो उल्लेख जातालो. गोंय मुक्त जाले उपरांत गोंय स्वतंत्र उरचे कांय महाराष्ट्रांत विलीन जावचे, हे विशीं वाद आशिल्लो. हो वाद सुटावो जावपा खातीर जनमत कौल जालो. जनमत कौला वेळार लेगीत गोंय स्वतंत्र उरपा खातीर कोंकणी मनशानी जागृताय केली. हाका लागून जनमत कौलांत गोंय स्वतंत्र उरचे असो कौल गोंयकारानी दिलो. हाचे उपरांत कोंकणी राजभाशे खातीर खर आंदोलन जाले. 29 जुलय 1985 दिसा कोंकणी राजभाशे खातीर पयली सभा जाली. हाचे उपरांत गोंयभर आंदोलन जाले. ह्या आंदोलनाची परिणती म्हूण 4 फेब्रुवारी 1987 हे दिसा राजभास कायदो संमत जावन कोंकणी राजभास जाली. कोंकणीची उदरगत आनी प्रशासनात तिचो वापर करपाची सगल्यांची जापसालदारकी आसा, अशें प्रा. हनुमंत चोपडेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
