कोंकणी रंगमाचयेचो फुडार सामको उज्वल. व्ही जी शेटगांवकारः मोरजे कोंकणी नाट्य महोत्सवाचें उक्तावण

भांगरभूंय | प्रतिनिधी

भांगरभूंय । प्रतिनिधी
पेडणे- कोंकणी रंगमाची समृद्ध आसा. कोंकणीत मराठी नाटकांच्या तोडीक तोड अशीं नाटकां आशिल्ल्यान कोंकणी रंगमाचयेचो फुडार सामको उज्वल असो आसा. मराठी रंगमाचये कडेन सर्त करपाची तांक कोंकणी रंगमाचये कडेन आसा अशें मोरजीच्या विज्ञाप्रसारक हायस्कुलाचो मुख्याध्यापक तशेंच कीर्तनकार व्ही जी शेटगांवकार हाणे सांगलें.
गोंय कोंकणी अकादेमी आनी मोरजी गणेशोत्सव सांस्कृतीक कला आनी खेळां मंडळाच्या जोड पालवान आयोजीत केल्ल्या 28 व्या कोंकणी नाट्य महोत्सवाचें उक्तावण केल्या उपरांत ते उलयताले. ह्या वेळार माचयेर मुखेल सोयरी मांद्रे उदरगत संस्थेची उपाध्यक्ष सिद्धी जीत आरोलकार, मोरजीचो सरपंच मुकेश गडेकार, गोंय कोंकणी अकादेमीचो अध्यक्ष  वसंत  सावंत, सचीव मेघना मेघना शेटगांवकार, निमंत्रक श्रीधर कामत बांबोळकार, मोरजी गणेशोत्सव ट्रस्टाचो अध्यश्र नाना  (चंद्रो) दाभोलकार, सांस्कृतीक आनी कला मंडळाचो अध्यक्ष दीपक शेटगांवकार आशिल्लो.
पुडें उलयतना व्ही जी शेटगांवकारान सांगलें की मोरजी गांवांत कोंकणीचें दायज आसा. हांगच्या देवळांत जायत्या कोंकणी नाटकाचे प्रयोग जातात. तियात्र सर्तींत मोजकीच्या संस्थांक पयले नंबर मेळ्ळ्यात. मारजे वाठारांत कोंकणी परंपरा आसा तशीच रावतली. आमचें मुळावें शिक्षण मराठींत जाला. कोंकणी बरोवपाक कुस्तार जाता तरी घरांत मात कोंकणींच आसता अशें सिद्धी आरोलकारान सांगलें. कोंकणीक बरो फुडार आसा हातूंत कसलोच दुबाव ना अशेंय तिणे सांगलें.
 कोंकणी ही गोंयची खरी वळख आसा. केरळांत कोची सारक्या शारांतल्या लोकांनी थंयची कोंकणीची पांचशें वर्सांची परंपरा लोकगीतांतल्यान सामाळून दवोरल्या. गोंयकारांनी गोंयची समृद्ध अशी कोंकणी परंपरा तिगोवन दवोरपाक जाय अशें वसंत सावंत हाणे सांगलें. मुकेश गडेकारान मोरजी गांवांत कोंकणी नाट्य महोत्सव आयोजीत केल्ले खातीर कोंकणी अकादेमीचे उपकार मानले.
मानेस्ताचे हस्तुकी पारंपारीक दिवली पेटोवन नाट्य महोत्सवाचें उक्तावण आनी यादस्तिकेचं प्रकाशन जालें. सुरवेक मेघना शेटगांवकारान सगल्यांक येवकार दिवंन प्रास्तावीक केले. दीपक शेटगांवकारान मानेस्तांक यादस्तिकां भेटयलीं. प्रसन्नकुमार शेटगांवकार, देवानंद गावडे, राजेश शेटगांवकार, सूर्यकांत शेटगांवकार, बाबी साळगांवकार, सावलो सावंत हाणी मानेस्तांक फुलां तुरे भेटोवन येवकार दिलो. विकास आजगांवकारान उक्तावण कार्यावळीचें सूत्रसंचालन केलें, प्रसन्नकुमार शेटगांवकारान उपकाराचें उलोवप केले. ह्या उपरांत  “एकावर एक फ्री ” ह्या नाटकाचो प्रयोग जालो.