भांगरभूंय | प्रतिनिधी
गोविंद गावडेः बेळगांवच्या उजवाड म्हयन्याळ्याचो रुप्या उत्सव उमेदीन
भांगरभूंय । प्रतिनिधी
बेळगांवः ल्हान भुरग्यांचेर संस्कार तांचे आवयभाशेंतल्यानूच जातात. दरेकल्यान आपली आवयभास सांबाळपाक जाय. संवसाराचे फाटीर खंयचोय कोंकणी मनीस गेलो जाल्यार ताका ताचे आवयभाशे वयल्यानूच वळखतात, अशें गोंयचे कला आनी सांस्कृतीक मंत्री गोविंद गावडे हांणी सांगलें.
बेळगांवच्या उजवाड ह्या कोंकणी म्हयनाळ्याच्या रुप्या महोत्सवी कार्यावळींत गावडे मुखेल सोयरे म्हूण उलयताले. उजवाड कोंकणी म्हायनाळ्याक 25 वर्सां पराय जाल्ले निमतान सेंट झेवियर्स हायस्कूल हॉल कॅम्प बेळगांवां कोंकमी महोत्सव आयोजीत केल्लो. हे कार्यावळीक गावडे हांचे वांगडा बेळगांवचे बिशप डॉ. डॅरीक फर्नांडीस अध्यक्षपदार आशिल्ले. बेळगांव उत्तरचे आमदार राजू सेठ, कोंकणी साहित्यीक आनी अखील भारतीय कोंकणी समेलनाची अध्यक्ष हेमा नायक, मिलाग्रीस कॉ- ऑपरेटिव्ह सोसायटीचे अध्यक्ष जॉर्ज फर्नांडीस, साहित्यीक प्रा. डॉ. भूषण भावे, लुईस रॉड्रिग्स माचयेर हाजीर आशिल्ले.
मंत्री गावडे हांणी सांगलें, कोंकणी गोंयची राजभास. कोंकणा लोक संवसारभर पातळ्ळ्यात. कोंकणी भाशेच्या संवर्धना खातीर आमचें सरकार सदांच यत्न करता. 25 वर्सां अखंडपणान चलिल्ल्या घांटमाथ्या वयल्या उजवाड ह्या कोंकणी म्हयनाळ्याचें, ताच्या संपादकाचें आनी ताच्या पुराय पंगडाचें तांणी कवतूक केलें.
येवकाराच्या उलोवपांत लुईस रॉड्रिग्स हांणी उजवाडचे वाटचालीचो नियाळ घेतलो.
प्रा. भावे हांणी सांगलें, कोंकणीचें सांस्कृतीक राज्य जावपाक जाय. कोंकणी मनीस संवसाराचे फाटीर खंयूय आसलो तरी ह्या कोंकणी सांस्कृतीक राज्याचो तो घटक आसपाक जाय. वेगवेगळ्या भागांनी वेगवेगळे तरेन कोंकणी भास उलयतात. कर्नाटकांत आनी केरळांत कोंकणी अकादेमी आसा, पूण महाराष्ट्रांत कोंकणी अकादेमी ना. ते खातीर गोंय सरकारान यत्न करपाक जाय. तशेंच गोंया भायर सुरू आशिल्ल्या कोंकणी भाशा आनी संवर्धना खातीर गोंय सरकार आनी गोंयांतल्या संस्थांनी आदार दिवपाक जाय, अशें तांणी सांगलें.
आमदार राजू सेठ, विशप डॅरीक फर्नांडीस, जॉर्ज फर्नांडीस हांणी ह्या वेळार आपले विचार मांडले.
ह्या वेळार मिलाग्रीस डिसोझा, अनामेरी बारदेस्कार, मोनिका डान्टस, गीता सुरेंद्र भगत, डॉ. मनिषा रेगो, बस्तू रेगे संतुलन संस्था, अशोक पै, फादर प्रदीप कोरिया, अंतोन डिसोझा, सावियो परेरा, गौरीश वेर्णेंकार, आंतोन डिसोझा अश्या 14 जाणांक उडवाड वतीन कोंकणी भोवमान पुरस्कार भेटयलो. जाल्यार आल्फी ममंतेरो, मिनीन गोन्साल्वीस, इलेन बोर्जीस हांचो उत्कृश्ट लेखक म्हूण भोवमान केलो.
दनपारच्या सत्रांत कला आनी संस्कृती खात्या वतीन आयिल्ल्या 25 ते 30 कलाकारांनी रंगतदार कोंकणी लोकनाचांची आनी परंपरीक गितांची कार्यावळ सादर केली. कार्यावळीक बेळगांव, गडहिंग्लज, चंदगड, पुणे, मुंबय, गोंय आनी हेर वाठारांतल्यान व्हड संख्येन कोंकणी भाशीक हाजीर राविल्ले. मिनीन गोन्साल्वीस आनी तानिया रॉड्रिग्स हांणी सुत्रसंचालन केलें. इलेन बोर्जिस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
