भांगरभूंय | प्रतिनिधी
विजय सरदेसाय: मडगांवां भेटयले युवा सर्जक पुरस्कार
मडगांव: गोंयकारपण सांबाळून दवरपा खातीर कोंकणी भाशा सांबाळपाची आनी तिची जतनाय करपाची गरज आसा. कोंकणी मनीस मुखार वचपा खातीर रवीन्द्र केळेकार हांची प्रेरणा घेवन मुखार वचपाची गरज आसा अशें उलोवप आमदार विजय सरदेसाय हांणी केलें. हे कार्यावळींत युवा सर्जक पुरस्कार आनी निबंद सर्तींतल्या जैतिवंतांचो भोवमान केलो.
मडगांवां रवींद्र भवनांतल्या सभाघरांत पद्मभूषण रवीन्द्र केळेकार हांच्या जल्मशती निमतान रवीन्द्र दर्शन ही कार्यावळ आयोजीत केल्ली. ह्या वेळार आमदार विजय सरदेसाय, दामोदर (भाई) मावजो, डॉ. किरण बुडकुले, डॉ. भूषण भावे, मनोहर बोरकार, वांगडी सचीव आग्नेलो फर्नांडीस बी मानेस्त हाजीर आशिल्ले.
हे कार्यावळींत युवा सर्जक पुरस्कार युगांक नायक, पुरुषोत्तम वेर्लेंकार आनी तन्वी कामत बांबोळकार हांकां भेटयले. तशेंच निबंद लेखन सर्तींतले जैतिवंत शुभा वेलींगकार, सुजाता कांबळी आनी देविता खुळे हांचो भोवमान केलो.
ह्या वेळार आमदार विजय सरदेसाय हांणी सांगलें, कोंकणी खातीर खूबशे जाण एकठांय आयिल्ले, आंदोलनां केलीं आनी जिखलींय बी. पूण हो सगलो लढो आयची स्थिती पळोवपा खातीर करूंक नाशिल्ली. रवीन्द्र केळेकार आयज आशिल्ले आनी तांचे विचार आयल्यार सद्याचे परिस्थितींत उदय भेंब्रे हांचेर एक कागाळ जाल्या. पूण केळेकार हांचेर दर सप्तकाक तांचेर कागाळी जावपाच्यो.
रवीन्द्र केळेकार हांणी निश्ठेन कोंकणीचो वावर मुखार व्हेल्लो. रवीन्द्र केळेकार वाचून जावचें ना, जाल्यार ते पचोवचेंय पडटलें. तांची प्रेरणाथळां खंयचीं हीं समजून घेवपाची गरज आसा. केळेकार हांची साधना आनी साध्य हाचो अभ्यास करचो. क्रांती करचे पयलीं आपलोच आपले कडेन संघर्श करचो पडटा. इतिहास केन्नाच विसरूंक जावचो ना. केळेकार हांणी कोंकणी मनशाच्या मनांत सदां खातीर स्थान मेळयलां अशें डॉ. किरण कुडकुले हांणी सांगलें.
साहित्यीक भाई मावजो हांणी सांगलें, केळेकार हांच्या लेखनांतल्यान आनी सहवासांतल्यान खूबश्यो गजाली शिकूंक मेळ्ळ्यो. लेखन आपल्या हातांतल्यान केन्नाय जावंक शकता. पूण वाचनांत खंड पडूंक दिवं नाकात. फक्त कोंकणी खातीर काम केलें म्हणून केळेकार व्हड नाशिल्ले जाल्यार तांच्या विचारांनी ते व्हड आशिल्ले आनी आपले विचार लोकां मेरेन पावयले ताका लागून ते व्हड आशिल्ले. कोंकणी मनशाच्या विचारांची प्रगती, कोंकणी मनशाची प्रगती हो उद्देश आसचो. केळेकार हांचे घर हें स्मारक म्हूण मुखार येवपाची गरज आसा. ते सुवातेर शाळेंतल्या भुरग्यांक व्हरून ते दाखोवन तांचे विचार भुरग्यां मदीं रुजोवपाची गरज आसा. कोंकणी हें साधन साध्य न्हय. गोंयकारपण हें साध्य आशिल्ल्याचो पुनरुच्चार केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
