भांगरभूंय | प्रतिनिधी
डॉ. हनुमंत चोपडेकार : आमचो इतिहास साहित्याच्या रुपांत हाडपाचो उलो
भांगरभूंय : विशाल सिनाय खांडेपारकार
केरळ : कोंकणी समाजाक एक भास आसा तसोच एक इतिहासूय आसा. विघटन आनी विस्थापन ही ह्या समाजाची शोकांतिका. आमच्या इतिहासान आमचो भुगोल घडयला हें सामकें खरें. कोंकणी मनशाचो हो आकांताचो इतिहास कादंबरीकारांक खातीर एक खजानोच आसा. आमचो इतिहास राजा महाराजांचो नासुंये, पूण प्रवाहा आड झुजपी तशेंच पेंवपी सर्वसामान्य समाज पुरुशाचो आसा. आयचे नवे पिळगे मेरेन तो साहित्याच्या माध्यमांतल्यान पावोवपाची जापसालदारकी कोंकणी कादंबरीकारांनी घेवची पडटली, कारण कोंकणी मनशाचें समाजीक अधिश्ठान ताच्या संघर्शमय इतिहासांत दडिल्लें आसा, अशें डॉ. हनुमंत चोपडेंकार हांणी सांगलें.
केरळांत 26 व्या अखील भारतीय कोंकणी साहित्य संमेलनांत कवी के. अनंत भट माचयेर ‘कोंकणी साहित्यांत इतिहासीक कादंबरी’ ह्या विशया वयल्या चर्चासत्रांत अध्यक्ष म्हूण डॉ. चोपडेकार उलयताले. ह्या वेळार उर्वशी नायक आनी जेसन पिंटो (कर्नाटक) माचयेर उपस्थीत आशिल्लीं.
जेसन पिंटो (कर्नाटक) हांणी म्हणलें, कोंकणी लोकांची एक पुराव्या सयत आशिल्लो कोंकणी लोकांनीच बरयिल्लो इतिहास खूब गरजेचो. कांय फावटीं काणीच सत्य आनी सत्य आशिल्लें मिथ्य जावपाची शक्यताय आसा. साहित्यकारांनी ही जबाबदारी पाळची पडटली. नीज इतिहास पळयतना कोंकणी लोक राय नासले तरी वेपारी, कारबारी, रायबारी, दुभाशीक, दंड वसूलदार, कृशी-उद्यमी बी आसले. हो निजाचो इतिहास लेगीत उजवाडाक येवपाक जाय.
समाजांत आशिल्ली देवदासी प्रथा, जातीवाद, आमिशान जावपी धर्मांतरां हांचें खंडन करपी साहित्य लेगीत निर्माण जांवक जाय. तशेंच वर्चस्व नाशिल्लो, साद्या मनशांचो इतिहास non-elite, sub-altern दिश्टीकोण आशिल्लें कोंकणी साहित्य जाय. दोन, कानडी लिपियेंत आशिल्ल्यो कोंकणी कादंबऱ्या हेर भासांनी, थोड्यो सोडल्यार चड येवंक नात. हेर लिपियांनी लेगीत वचूंक नात आनी हेर लिपियांनी आमचें साहित्य कानडी लिपियेंत येवंक ना. लिपीवाद म्हणल्यार म्हाजाळांत असलें मोलादीक साहित्य शिरकून उरलां, अजुनूय शिरकलां म्हणल्यार चूक जावची ना. तांची गैरहाजरी हाका एक गवाय अशें पिंटोन सांगलें.
उर्वशी नायकान कादंबरीचेर विचार मांडटना सांगलें, 1510 त पुर्तुगेजांनी गोंय आपल्या शेकातळा हाडून थळाव्या मुस्लीमांच्या शेकातळा आशिल्ल्या वाठारांतल्यान युरोपी वसणूकवादी चौकींत रुपांतर केलें. पुर्तुगेज अधिकार लादिल्ल्यान शासन, वेपार आनी लश्करी संघटना हातूंत बदल घडले. वसणूकवादी सत्तेन दिसपट्टे जिणेंत बदल जालो, युरोपी कायदेशीर संरचनेन सद्याच्या संरचनेची सुवात घेतली, थळाव्या राज्यकर्त्यांक सहकार वा कुशीक काडले आनी सत्तेचे गतीशीलतेंत कायम स्वरूपी बदल जालो. कादंबरींत सुरवेच्या वसणूक काळांतल्या गोंयचें चित्रण जिखपाच्या गुंतागुंतांचेर भर दिता: प्रसंगांनी पोरण्या आनी नवे वेवस्थेच्या सहअस्तित्वाचें वर्णन केलां, प्रशासकीय सुदारणां चड करून हिंसाचार वा जबरदस्तीन लागू करतात. हो संदर्भ म्हत्वाचो आसा, कारण तो पात्रांक विस्थापन आनी पुनर्व्याख्येच्या व्यापक भरती भितर दवरता. के विश्वनाथन येवकार दिवन मानेस्तांक मानचिन्नां दिलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
