भांगरभूंय | प्रतिनिधी
गोंय विद्यापिठांत कोंकणी राष्ट्रमान्यताय दीस उमेदीन मनयलो
पणजीः कोंकणी भाशा फक्त कोंकणी विशया पुरतीच मर्यादीत रावनासतना ताचो वावर हेर विशयांत जावप गरेजेचें आसा. हे खातीर सरकारान कोंकणीची सक्ती सरकारी नोकरे खातीर करून गोंयकारां खातीर नोकरी राखून दवरल्या. म्हाविद्यालयांतल्या फक्त कोंकणी विभागांतच न्हय हेर विभागांनी लेगीत कोंकणी भास ही वळख आसपाक जाय अशें शिक्षक आनी लेखक डॉ. राजय पवार हांणी सांगलें.
गोंय विद्यापिठाचे शणै गोंयबाब भाशा आनी साहित्य महाशाळेच्या कोंकणी अध्ययन फांट्यान कोंकणी राष्ट्रमान्यताय दीस उमेदीन मनयलो. ह्या वेळार डॉ. राजय पवार हे मुखेल सोयरे म्हूण उलयताले. तशेंच माचयरे मानाचे सोयरे म्हूण शिक्षक आनी लेखक भिकू नायक, शणै गोंयबाब भाशा आनी साहित्य महाशाळेची अधिश्टाती प्रा. अनुराधा वागळे आनी कोंकणी अध्ययन फांट्याची संचालक कृपाली नायक हाजीर आसलीं.
राष्ट्रमान्यताय दीस हो फक्त कोंकणी विद्यार्थ्यांनीच न्हय तर हेर विभागांतल्या भुरग्यांनीय मनोवचो. वाणिज्य, विज्ञान, आभियांत्रिकी, वैजकी कसलोय विशय आसूं तांणी कोंकणीचो आस्पाव करून ह्या विशयांनी कोकणींत मजकूर उजवाडाक हाडचो. कोंकणीचो संविधानाचे आठवे परिशिश्टींत आस्पाव जाला. जर कोणूय कोंकणीक बोली भास म्हूण हिणयता आसत जाल्यार तो संविधानाचो अवमान थारता. देखून कायदो मळार कोंकणी शिकिल्लो भुरगो हे विशीं याचिका दाखल करपाक शकता अशें पवार हांणी सांगलें.
सराकरी नोकरे खातीर कोंकणी भास गरजेची असो नेम घातला. पूण आभियांत्रिकी, वैजकी आनी कायद्याचे विद्यार्थी हो नेम कित्याक काय असो प्रस्न पडटा. उदाहरणांत जर मराठी शिक्षकांच्या पदां खातीर महाराष्ट्रातल्यान मनीस येता आनी ताका कोंकणी कळना जाल्यार तो अपात्र थारता देखून फक्त मराठी शिकोवपी गोंयकारांकच ही नोकरी राखीव जाता. गोंयकारांक नोकरी मेळची हे खातीरचे ते साधन आसा, अशें पवार हांणी म्हणलें.
भिकू नायक हांणी कार्यावळीक हाजीर आशिल्ल्या विद्यार्थ्यांक कोंकणी चळवळीचो इतिहास सांगून कोंकणीक राजभास दर्जो आनी राष्ट्रमान्यताय वावुरप्यांनी केल्लो वावर तशेच कश्टा विशीं म्हायती दिली.
गोंय हें महाराष्ट्रा पासत वेगळें जावन ताका घटकराज्य हें फक्त कोंकणीकच लागून मेळ्ळें. गोंय हें स्वतंत्र उरपाक जाय आनी कोंकणीच आमची भास अशे लोकांनी स्पश्ट सांगलें. जर गोंय महाराष्ट्रांत विलीन जाल्लें जाल्यार गोंयात फक्त दोन आमदार आनी एक खासदार आसतलो आशिल्लो. महाराष्ट्रांत जी अधोगती चल्ल्या तशीच स्थिती गोंयची आसपाची देखून कोंकणी तिगोवन दवरपा खातीर तुमी कोंकणी उलोवपाक जाय असो उलो नायक हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
