भांगरभूंय | प्रतिनिधी
वाळपई : गोंयांत नोंद जाल्ल्यो सुमार ४९७ सवण्यांच्यो प्रजाती राज्यांतलें सवण्यांचे प्रर्यटन व्हडा प्रमाणांत चालीक लावपाक शकतात, अशें मत मुखेल सचीव डॉ. व्ही. कंदावेलू हांणी उक्तायलें. तांणी मुखार सांगलें, कोंकणी भाशेंत सवण्यांचेर म्हायती प्रकाशीत जावप गरजेचें. थळावे भाशेंतलीं पुस्तकां उपलब्ध जाल्यार नागरिकांक आपल्या वाठारांतलीं पक्षीप्रजाती वळखप आनीक सुरळीत जातलें. अशा महोत्सवांक लागून सवणीं आनी परिसंस्थां विशीं जनजागृती, शिक्षण आनी संवर्धनाची जाणीव नागरिकां मदीं वाडपाक लागता, अशेंय तांणी नमूद केलें.
ते वाळपय आयोजीत ९ व्या सुवणीं महोत्सवांत उलयताले. ह्या वेळार प्रधान मुख्य वनसंरक्षक कमल दत्ता हांचे सयत रान विभागाचे अधिकारी हाजीर आशिल्ले.
मुखेल सचिवांनी भारतांतलें सवणें संशोधन आनी संवर्धन वाठारांतल्या मोलाच्या योगदाना विशीं डॉ. सलीम अली हांकां अभिवादन केलें. तांणी म्हादय रान जीव अभयारण्याचें पर्यावरणीय म्हत्त्व अधोरेखीत करतना हांगा मेळपी समृद्ध वनस्पत आनी जैवविविधताय राज्या खातीर अभिमानाचें आशिल्ल्याचें सांगलें.
प्रधान मुखेल रान संरक्षक कमल दत्ता हांणी अंदूंच्या महोत्सवाक बरो प्रतिसाद मेळिल्ल्याचें सांगलें. गोंयच्या ४९७ पक्षीप्रजातींक लागून राज्य सवणी मोगीं खातीर म्हत्वाची सुवात थारिल्ल्याचें तांणी नमूद केलें. फाटल्या वर्सा खोतीगांव रान जीव अभयारण्य हांगा जाल्ल्या महोत्सवा उपरांत सवण्यांचेर अंदूं दोन नवीं पुस्तकां प्रकाशीत करतले. तातुंतल्यान संवर्धन कार्याक बळ मेळटलें, अशें तांणी स्पश्ट केलें.
दत्ता हांणी सांगलें, सुमार ७५० चौरस किलोमीटर वाठार सवण्यांच्या संवर्धना खातीर राखीव दवरलां. तयार केल्लें दस्तऐवजीकरण रान विभागाक सवण्यांची वळख आनी निरीक्षणा खातीर उपेगी थारतले. महोत्सवांतलो निश्कर्श प्रकाशीत करतले अशी म्हायतीय तांणी दिली.
कार्यावळी मजगतीं ‘अटलास ऑफ द बर्ड्स ऑफ गोवा’ ह्या संदर्भग्रंथाचेंय सादरीकरण केलें. तशेंच रान जीव संवर्धना खातीर योगदान दिवपी मनशाचो सन्मान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
