भांगरभूंय | प्रतिनिधी
कोंकणी विशयांत सगळ्यांत चड गूण मेळयल्ल्या विद्यार्थ्यांचो करतले भोवमान
पणजी: अंदूं संवसारीक मायभास दिसा निमतान कोंकणी भाशा मंडळ, गोंय वतीन ‘भास-संवाद’ कार्यावळीचें आयोजन केलां. ही कार्यावळ 21 फेब्रुवारीक सकाळच्या 9.30 वरांचेर मडगांवच्या रवीन्द्र भवनाच्या सभाघरांत जातली.
नामनेच्या लेखकां सयत तरणाटीं आनी अभ्यासक हांचे मदीं विशेश संवाद कोंकणी भाशा मंडळ घडोवन हाडटलें. गोंयचीं खुबशीं म्हाविद्यालयां तशेंच विद्यापिठांचे आनी शाळेंतले विद्यार्थी, विवीध शाळांतले शिक्षकूय हे कार्यावळीक वांटेकार जातले.
ह्या वेळार ज्ञानपीठ पुरस्कार फावो जाल्ले ज्येश्ठ लेखक दामोदर मावजो आनी सरस्वती पुरस्कार फावो जाल्ले लेखक हांचे वांगडा संवाद आयोजीत केला. ताका लागून शाळेंतल्या, म्हाविद्यालयांतल्या शिक्षकांनी तशेंच विद्यार्थ्यांनी व्हडा संख्येन हाजीर रावचें. ही कार्यावळ सगळ्यां खातीर उक्ती आसतली असो उलो मंडळाची अध्यक्ष अन्वेषा सिंगबाळ हांणी दिला.
ह्या वेळार कोंकणी विशयांत सगळ्यांत चड गूण मेळयल्ल्या विद्यार्थ्यांचो भोवमान करतले. हातूंत धावेचे विद्यार्थी लॅकेंझिया फर्नांडीस, दृश्टी गांवकार, निधी कपील पै वैद्य, भुमी गोसावी, डॅरील फिलीप ल्यूक डिसोझा, पलिया सिनाय अग्नी, श्रेया भट हांचो आसपाव आसा. तशेंच बारावेचे विद्यार्थी दिया सांवड्डेंकार, नेहा सिनाय भांगी, रविना वेळीप, शर्वा चोडणकार, बि. ए. परिक्षा खातीर एन्ड्रिया बाप्तिस्ता, एम. ए. परिक्षे खातीर काजल नायक हांचो भोवमान करतले.
चड म्हायती खातीर ब्रिजेश शेट देसाय (9673453367) वा अभिजीत पागी (9545338713) हांचे कडेन संपर्क करचो. हे विशीं मंडळाचे शिक्षणीक पुरस्कार आनी शिश्यवृत्ती भेटयतले. ह्या वेळार शर्वरी शेट करमळकार, दिपांक्षा गांवकार, हार्दीक राणे, शुभांगी गांवकार, खुशी प्रभुदेसाय, प्रिया लवंदे आनी शर्वा चोडणकार हांकां सर्गेस्त पद्मजा माणिकराव गावणेकार शिक्षणीक शिश्यवृत्ती भेटयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.