भांगरभूंय | प्रतिनिधी
भांगरभूंय । प्रतिनिधी
मडगांवः कोंकणी भाशा मंडळ, गोंय आयोजीत 22व्या शणै गोंयबाब कथामाळेची मुळावी फेरी अंदू शेनवार 26 ऑगस्टाक जातली. सर्तीक मेळपी उपाट प्रतिसाद पळोवन आयोजकांनी फाटल्या कांय वर्सां सावन जिल्हो पांवड्यार सर्तीचें आयोजन केलां. तांच्यो फेरयो 3 सप्टेंबराक सकाळीं 9 वरांचेर कोंकणी भाशा मंडळांत जातल्यो आनी ते उपरांत तेच दीस सांजे राज्य स्तरीय सर्त जातली. भाशा मंडळ अध्यक्ष अन्वेषा सिंगबाळ आनी पलाश अग्नी हांणी एके पत्रकार परिशदेंत ही म्हायती दिली.
केंद्रीय पांवंड्या वयली सर्त वट्ट 18 केंद्रांनी चलतली. बारा तालुक्यांत 12 आनी कुंकळ्ळी, बार्देस, फोंडें, तिसवाडी आनी मडगांव मेळून वट्ट 18 केंद्रांचेर ही सर्त जातली. साश्टी आनी केपें तालुक्यांतल्या कांय विद्यालयांचो आसपाव कुंकळ्ळी केंद्राचेर केला. वट्ट 160 वयर परिक्षक आनी 300 वयर आप वावुरपी ही सर्त येसस्वी करपाक वावुरतले. आयोजकांनी हालींच शिक्षक, परिक्षक तशेंच तालुका संयोजकां खातीर खासा कार्यशाळा घडोवन हाडून हे सर्ती फाटलो हेत तशेंच सर्तीचे नेम तांचे मेरेन पावयल्यात.
ही कथामाळ पयली ते चवथी, पांचवी ते सातवी व आठवी ते धावी अशा तीन गटांनी आयोजीत जातली. सगळ्या सर्तकांक प्रशस्तीपत्रकां आनी केंद्रावेल्या जैतीवंतांक पुस्तक रुपान इनामां भेटयतले. ही सर्त पयलीं शाळेंत घेवची ह्या मंडळाच्या उल्याक साबार शाळांनी उस्फूर्त प्रतिसाद दिला. शालेय पावंड्या वयल्या जैतिवंताक शाळांनी केंद्र पांवड्या वयले सर्तीक धाडचें अशें भाशा मंडळान कळीत केलां. शालेय पावंड्या वयल्या ह्या सर्तकांकय मंडळ प्रशस्तीपत्रकां भेटयतलें.
केंद्रीय पांवंड्यार जावपी सर्तींत दर एका गटांतल्यान जर पंदरा मेरेन सर्तक वांटेकार जाले जाल्यार तांच्यांतल्यान दोन जैतिवंत आनी उपरांतच्या दरेका पंदरा सर्तकां फाटल्यान आनीक एक जैतिवंत वेंचून काडटले असो नेम आसलो तरीय कितले सर्तक निमण्या पातळेचेर वेंचून काडचे हाचे पुराय स्वातंत्र्य आयोजकांनी परिक्षकांक दिला.
हे कथाकथान सर्ती संबंदीची सगळी म्हायती आनी नेम गोंयांतल्या सगळ्या मुळावे आनी माध्यमीक शाळांनी पावयल्यात. चडावत म्हायती मखातीर सर्तीचे संयोजक पलाश अग्नी हांकां 7350426399 ह्या मोबायल नंबराचेर वा सह-संयोजक शलाका देसाय हाका 9049750869 ह्या मोबायल नंबराचेर संपर्क सादचो अशें कळीत केलां..
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
