भांगरभूंय | प्रतिनिधी
पणजी: हालींच जाल्ले कोंकणी भाशा मंडळाचे वावुरपी समितीचे बसकेंत कोंकणी भाशा मंडळाच्या अध्यक्षपदार रत्नमाला दिवकार हांची निवड जाल्या. फाटले स म्हयने तांणी प्रभारी अध्यक्ष म्हण कारभार सांबाळिल्लो. आदली अध्यक्ष अन्वेषा सिंगबाळ हांणी वयक्तीक कारणाक लागून अध्यक्षपदाचो राजिनामो दिल्लो देखून हें पद रितें आशिल्लें. रत्नमाला दिवकार हांणी अचकीत आयिल्ली जापसालदारकी येसस्वीपणान उबारली देखून समितीन एक मतान तांची निवड केली. बंद पडिल्लो चित्रंगी मेळावो तांणी खास लक्ष घालून घडोवन हाडलो. रत्नमाला दिवकार हांची अध्यक्षपदाचेर निवड जातकच उपाध्यक्षपद रितें जाल्लें ताचेर रुपेश ठाणेकार हांची निवड केल्या.
रत्नमाला दिवकार, शिक्षक म्हण ह्या वर्सा निवृत्त जाल्यात. आदले विद्यार्थी चळवळीच्यो त्यो सक्रीय वांगडी. तांची बालसाहित्याचीं साबार पुस्तकां आनी गितां प्रकाशीत जाल्यांत. तांकां गोवा कोंकणी अकोदेमीचो पुरस्कार फावो जाला. रत्नमाला दिवकार हांणी उपेक्षीत आशिल्लें शिक्षणीक आनी बालसाहित्याचें मळ हांचेर भर दिवन मंडळाचे हेर उपक्रम नेटान मुखार व्हरपाचेर भर दिवपाचें थारायलां. बंद पडिल्लो गोवा युवा महोत्सव परत नेटान सुरू करपाचेरूय भर दितलीं म्हणपाचें तांणी स्पश्ट केलां. तांणी उद्देजक दत्ता दामोदर नायक हांकां मंडळाक एक कोटी रुपयांची देणगी दिवपाचो मानस उक्तायिल्ले खातीर उपकार मानल्यात.
रुपेश ठाणेकार हे स्वता गोवा युवा महोत्सवांतल्यान तयार जाल्यात म्हणपाचें मान्य करता. ते सद्या मयेंच्या विजयानंद ज्ञानप्रसारक संस्थेचे आनी दिवचल कोंकणी केंद्राचे अध्यक्ष आसात. तशेंच गोंय शांलांत मंडळाचे उपाध्यक्ष म्हण काम पळयतात म्हणपाचें सचीव मंगलदास भट हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
