भांगरभूंय | प्रतिनिधी
मडगांव : कोंकणी भाशा मंडळाची पुराय गोंयभर लोकप्रीय जाल्ली नाच आनी संगिताची ‘पेटूल’ ही बालगितांचेर आदारिल्ली कार्यावळ अंदूं पुणे शारांत जातली. सीटी प्रायड ग्रुप ऑफ स्कूल्स, पुणे वतीन निगडी- पुणेच्या ग. दी. माडगुळकर नाट्यगृहांत 14 डिसेंबराक सांजवेळा 5 वरांचेर ही कार्यावळ जातली.
कोंकणी भाशा मंडळ फाटलीं कितलीशींच वर्सा ‘शाणी मस्ती’ नांवाचे बालगितांचे सीडीची निर्मिती करता. हे माळेंतले आठवे सीडीचें पुणेच्या पेटूल कार्यावळींत लोकार्पण जातलें. मडगांवच्या रेडिओ बुयांव स्टुडिओंत तयार केल्ले हे सीडींतलीं गितां मीना काकोडकार, राजय पवार, मॅल्वीन रॉड्रिग्स, रत्नमाला दिवकार, चेतन आचार्य, राजश्री सैल आनी नयना आडारकार हांणी रचल्यांत. गौतमी हेदे, वेदिका वाळके, धिती लोटलीकार, लक्ष्मण नायक, गायत्री पाटील, अनुपमा प्रभुदेसाय, लव्या गुरव, ईशा शिरवयकार, आयान भट, युगा सांबारी, ऍशल केझिया डिसोझा, ग्लॅनिशा म्युरल डिसोझा, खूश पेडणेंकार, श्रीजा फडते, आरोही नायक, क्रिजायला फर्नांडीस, आर्यमन रायकार, श्रीजा आळवे, दुर्वा सांखळकार, ज्योएन डिसिल्वा, रोझएन डीसिल्वा, सुझन डीसिल्वा, रत्नमाला दिवकार, साई पाणंदीकार, सिद्धनाथ बुयांव हांणी हीं गितां गायल्यांत. प्रसाद शिंक्रो, साईश पाणंदीकार आनी गौतमी बांबोळकार हांणी ह्या गितांक संगीत दिलां. संगीत रचना, मिक्सींग, मास्टरींग सिध्दनाथ बुयांव हांणी केलां. ऋत्वीक बुयांव, यतीन तळावालीकार आनी राजकुमार सेन गुप्ता हांणी वाद्यवादक म्हणून काम केलां.
हे कार्यावळींत कोंकणी भाशा मंडळान तयार केल्ल्या बोर्ड बुक्स तशेंच ‘मज्जा मस्ती’ सीडींतल्या गितांचेर एनिमेशन व्हिडीयोंचे प्रकाशन जातलें.
हे कार्यावळीक समीर धर्माधिकारी मुखेल सोयरे म्हणून हाजीर आसतले. भाशा मंडळाची प्रभारी अध्यक्ष रत्नमाला दिवकार आनी सीटी प्रायड ग्रुप ऑफ स्कूल्स, पुणेची संचालक अश्विनी कुलकर्णी आनी दिपाली सवाई ही खाशेली सोयरी म्हणून हाजीर आसतलीं. तशेंच ह्या नाचाचे कार्यावळींत सीटी प्रायड ग्रुप ऑफ स्कूल्सच्या विंगड विंगड शाळांचे 400 विद्यार्थी वांटो घेतले.
कोंकणी भाशा मंडळाची प्रभारी अध्यक्ष रत्नमाला दिवकार, पलाश अग्नी, साईश पाणंदीकार हांणी पत्रकार परिशदेंत ही म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
