भांगरभूंय | प्रतिनिधी
मडगांव ः गोंयचे उद्येजक चिराग दत्ता नायक हांणी शुक्रारा आपलो बापूय दत्ता दामोदर नायक हांच्या 70 व्या वाडदिसाच्या निमतान कोंकणी भाशा मंडळाक एक कोटी रुपयांची देणगी दिवपाची घोशणा केली.
चिराग नायक हांणी मडगांवांत पत्रकार परिशद घेवन ही म्हायती दिली. ह्या वेळार दत्ता नायक आनी प्रा. भास्कर नायक हेवूय हाजीर आसले. दत्ता नायक हांच्या वाडदिसाच्या निमतान कोंकणी भाशा मंडळाक 1 कोटीची देणगी दितले अशें चिराग नायक हांणी सांगलें. हे रक्कमेच्या व्याजांतल्यान कोंकणी भाशा मंडळ दर वर्सा चित्रंगी बायलांचो मेळावो आनी समाजीक परिशद घडोवन हाडटलें. फामाद कोंकणी लेखकांच्या साहित्याचेर एक दिसाची कार्यशाळा घडोवन हाडची अशें आपूण सुचयता अशें तांणी सांगलें.
समाजातले अशें घटक जें कोंकणी बरोवंक शकनात, तांच्या अणभवांचे शब्दांकन करुन ताचेर पुस्तक प्रकाशीत करचें अशीय सुचोवणी कोंकणी भाशा मंडळाक केल्या.
राष्ट्रभाशा प्रचार समिती, वर्धा आनी टिळक महाराष्ट्र विद्यापीठ, पुणे जशें हिंदी, संस्कृत आनी गणिताची परिक्षा घेतात तशीच भाशा मंडळान कोंकणी खातीर बालबोधिनी, प्रवेश, प्रबोध, प्रवीण आनी पंडित अशा पांच पांवड्यावेल्यो परिक्षा घेवच्यो अशी सुचोवणी चिराग नायक हांणी केल्या. उरिल्ल्या निधींतल्यान उत्कृश्ट कथांचेर टेलीफिल्म तयार करपाची विनंती कोंकणी भाशा मंडळाक केल्या. आपल्या उद्देग गटा वरवीं ५ कोटी रुपयांचो फाऊंटेनहेड चॅरिटेबल ट्रस्ट स्थापन करतले, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
