भांगरभूंय | प्रतिनिधी
पणजीः ज्या लोकांची मायभास कोंकणी आसा वा जे कोंकणी शिकल्यात तांकां सरकारी नोकरे खातीर कोंकणी गिन्यानाचें प्रमाणपत्र घेवपाची गरज ना, अशें मुख्यमंत्री डॉ. प्रमोद सावंत हांणी सांगलें. सरकारी नोकरे खातीर कोंकणी सक्तीची केल्ल्यान गोंय कोंकणी अकदमी कडल्यान ताचें प्रमाणपत्र घेवचें पडटा. कांय जाणांचो ह्या विशयाचेर घुस्पागोंदळ जाला. हे विशीं मुख्यमंत्र्यान लक्ष घालपाचें आश्वासन दिलां.
सरकारी नोकरे खातीर कोंकणी प्रमाणपत्राचो विशय केपेंचे आमदार एल्टन डिकोस्टा हांणी शुन्य वरा वेळार विधानसभेंत मांडिल्लो. सरकारी नोकरेंत कोंकणी प्रमाणपत्र सक्तीचें केलां ही बरी गजाल. पूण जांची मायभास कोंकणी आसा, जे कोंकणी शिकल्यात तांकां ही सक्ती करची न्हय, अशें एल्टन हांणी मागलें.
ह्या विशयाचेर जाप दितना डॉ. सावंत हांणी सांगलें, जाची कोंकणी मायभास आसा वा तो ती शिकला ताका गरज ना.
पूण मुखार एल्टन हांणी सांगलें, सरकारान हें प्रमाणपत्र सक्तीचें केलां आनी तें घेवपाक कोंकणी अकादेमींत उमेदवारांची गर्दी पडल्या. तांकां अर्जाचे निमणे तारखे पयलीं हें प्रमाणपत्र दिवपाक जाय आनी ताचे पयलीं तें मेळप कठीण आसा.
अर्ज भरपाचे निमणे तारखेर मुजतवाड दिवपाची मागणी एल्टन हांणी केली.
ह्या विशयाचेर लक्ष दिवन उपरांत स्पश्टीकरण दिवपाचें मुख्यमंत्री डॉ. सावंत हांणी सांगलें.
ह्य वेळार कोंकणीची सक्ती काडपाक सोदता असो दावो विजय सरदेसाय हांणी केलो. तांकां जाप दितना मुख्यमंत्र्यान सांगलें, कोंकणीची सक्ती काडिना. इतलो तेंप कोणेंच करूंक नाशिल्ली ती कोंकणीची सक्ती हांवेंच घाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
