भांगरभूंय | प्रतिनिधी
आजोबा कल्चरल असोसिएशन आनी श्री महागणपती महिला भजनी मंडळ पयलें
भांगरभूंय । खबरां मेज
पणजीः भांगराळें गोंय अस्मिताय, श्री म्हालसा नारायणी देवालय वेर्णा, कोंकणी नाटक संगीत अकादमी हांच्या जोडपालवान घडोवन हाडिल्लें कोंकणी भजन सर्तींत दादल्यांच्या गटांत आजोबा कल्चरल असोसिएशन केरी- सत्तरी, बायलांच्या गटांत श्री महागणपती महिला भजनी मंडळ आमोणें (दिवचल) हांकां पयलीं इनामां फावो जालीं.
वेर्णे हांगा श्री म्हाळसा नारायणी देवळाच्या प्राकारांत देवस्थानाच्या सभाघरांनी ही सर्त जाली. उक्तावण सुवाळ्यांत लोकमत दिसाळ्याचे संपादक सदगुरू पाटील हे मुखेल सोयरे, स्मार्ट लिंकाचे कमलाक्ष नायक, कोंकणी नाटक संगीत अकादमीचे अध्यक्ष श्रीधर बांबोळकार हाजीर आशिल्ले. 13 पथकांनी हे सर्तींत वांटो घेतलो.
सर्तींत दादल्यांच्या गटांत दुसरें इनाम श्री लक्ष्मी भजन मंडळ सावयवेरें, तिसरें श्री विठ्ठल रखूमार्इ भजनी मंडळ सत्तरी हांकां फावो जालें. उमेद वाडोवपीं इनामां श्री शांतादुर्गा नृसिंह भजनी मंडळ सांकवाळ आनी शांतादुर्गा भजनी मंडळ धामशें सत्तरी हांकां फावो जालें. बायलांच्या गटांत दुसरें इनाम श्री नागेश महारूद्र महिला भजनी मंडळ बांबोळें आनी तिसरें इनाम प्रतीक कला महिला मंडळ मौळाभाटी हांकां फावो जालें.
उमेद वाडोवपी इनामां श्री पांडुरंग ब्रम्हश्वेर मंडळ आखाडा तिसवाडी आनी श्री महालक्ष्मी महिला भजनी मंडळ उपासनगर सांकवाळ हांकां फावो जालीं.
वैयक्तीक इनामां फुडें दिल्ले प्रमाण. उत्कृश्ट गायन दादलो गटांत- गौतम गांवस, उत्कृश्ट गायक बायल गटांत प्रविणा गांवस, उत्कृश्ट गवळण गायन दादलो गटांत विनीत गांवस, उत्कृश्ट गवळण गायन बायल गटांत करिश्मा काणकोणकार, उत्कृश्ट हार्मोनियम दादले गटांत पांडुरंग गांवस, उत्कृश्ट हार्मोनियम अस्तुरी गटांत विशाल कुर्डीकार, उत्कृश्ट पखवाज दादले गटांत निरज गावडे, उत्कृश्ट पखवाज बायल गटांत वृंदा कुंकळकार, उत्कृश्ट घुमट दादले गटांत सुभम कडेकार, उत्कृश्ट घुमट बायल गटांत क्षीजीत फडटे, उत्कृश्ट कांसाळें- सर्वांग नायक, साईश वेर्णेकार, उत्कृश्ट गजर भजन- श्री सांतेरी केळबाय भजनी मंडळ पडोशें सत्तरी, बायल गटाचें खास इनाम कृष्ण नागझरकार बाल भजनी मंडळ, भोमा हांका फावो जालें.
सर्तीच्या इनामां वाटप सुवाळ्यांत कमलाकर म्हाळशी, विवेक पिसुर्लेकार, नामदेव सुर्लकार, महेश चं. नायक हांच्या वांगडा परिक्षक मोहनदास पोळे, प्रल्हाद गांवस, विठ्ठल शिरोडकार, गणेश पार्सेकार, दुर्गाकुमार नावथी, प्रेमानंद वेळुसकार हाजीर आशिल्ले. सुत्रसंचालन उदय गुडे आनी सूरज कोमरपंत हांणी केलें. कार्याध्यक्ष सुहास वेर्णेकार हांणी येवकार दिलो. उपकार राजेश प्रभू हांणी मानलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
