भांगरभूंय | प्रतिनिधी
पणजी : सरकारी कामकाजांत राजभाशा कोंकणीचो वापर चडांत चड जावचो, ह्या उद्देशान ‘ध्यास कोंकणी’ ह्या संकेतथळान कोंकणी पत्रां आनी अर्जाचे नमुने आपले वॅबसायटीर उपलब्ध केल्यात. ते फुकट आसात.
माहिती हक्क अधिनेमा खाला अर्जाक जाप, आरटीआर अर्ज हस्तांतरीत करप, नोकरे खातीर अर्ज, रजे खातीर अर्ज, कार्यग्रहण अहवाल (Joining report), रजेकालीन प्रवास सवलत (LTC), मुख्यालय सोडपा खातीर मान्यताय अश्या सरकारी कामकाजांत लागपी पत्रांचो आनी अर्जांचो तातूंत आसपाव आसा. तशेंच नागरीक म्हणून सरकारी कार्यालयांनी कागाळ वा अर्ज करूंक जाय जाल्यार ताचे नमुने www.dhyaskonkani.com हे वॅबसायटीर आसात.
कोंकणींतल्यान सरकार चलचें आनी सरकारी कर्मचार्यांक येवपी आडमेळीं पयस जावचीं म्हणून हें पावल उबारलां अशें ‘ध्यास कोंकणी’चें संस्थापक स्नेहा सबनीस हांणी सांगलें. हो वावर करूंक साबार सरकारी कर्मचार्यांनी तशेंच कोंकणी कार्यकर्त्यांनी मदत केल्या.
सरकारी कर्मचार्यांनी कोंकणींतल्यान पत्रवेव्हार करचो अशें आमकां सगळ्यांक दिसता पूण जायते कर्मचारी कोंकणी केन्नाच शिकूंक नात. ते खातीर, तांकां बरयतना कोंकणीचो भंय दिसता. बऱ्याच जाणांक कोंकणी बरोवपाची संवकळ ना. अश्या कर्मचार्यांक ह्या नमुन्यांचो फायदो जातलो अशी आस्त आमकां आसा अशें ध्यास कोंकणीचो सनथ भरणे हांणी सांगलें.
कोंकणी सुविचार धरून कोंकणींतलें साहित्य सामान्य मनश्यांक सोंपेपणीं मेळचें ह्या उद्देशान सुरू केल्ल्या ध्यास कोंकणी संकेतथळाचेर निबंद, आमंत्रण पत्रिका, सुत्रसंचालनाचे नमुने, म्हणी, उमाणीं, आप-उलोवप, लोकगितां मेळटात. कोंकणीचो प्रसार जावचो म्हणून सनथ भरणे आनी हृषिकेश कदम हांणी ध्यास कोंकणी माथाळ्या खाला कोंकणी टी-शर्टाय केल्लीं. ताकाय बरो प्रतिसाद लाबत आसा.
संकेतथळ डिजायन करप आनी ताचेर साहित्य घालपाचो वावर पलाश अग्नी, स्नेहा सबनीस आनी शुभेच्छा भरणे सांबाळटात. संकेतथळ चलोवपाचो पुराय खर्च ह्या कोंकणी कार्यकर्त्यांनी उबारला. ह्या संकेतथळाचेर कोंकणी शिक्षण, प्रशासन वा मनरिजवणाचे नदरेंतल्यान कसल्याय साहित्याचो आसपाव जावंक जाय जाल्यार [email protected] हाचेर ईमेल करूं येता, अशें सनथ भरणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
