भांगरभूंय | प्रतिनिधी
दिनेश मणेरकार : परिशदे वतीन उपलब्ध करपाची सुचोवणी
भांगरभूंय । विशाल खांडेपारकार
केरळ : कोंकणी पुस्तकां भोंवडेकार पासत विमानतळार उपलब्ध आसूंक जाय. परिशदेचे वतीन विमानतळार पुस्तकां भोंवडेकार पासत उपलब्ध करून दिवंक सरकाराचोय आदार घेवचो. जाणटेल्यांनी वाचन सोडलें देखून आमच्या भुरग्यांनी वाचन सोडलें. लोक चलून वाचनालयांत वचना. वाचपघरांत पावतलीं तेन्नाच भुरगीं वाचतलीं, अशें प्रकाशक दिनेश मणेरकार (गोंय) अशें सांगलें.
केरळांत 26 व्या अखील भारतीय कोंकणी साहित्य संमेलनांत कवी के अनंत भट माचयेर ‘कोंकणी पुस्तक प्रकाशनां मुखार वयलीं आव्हानां’, ह्या विशया वयल्या सत्रांत मणेरकार उलयताले. ह्या सत्राचे अध्यक्ष म्हूण मॅल्वीन रॉड्रिगस (कर्नाटक) उपस्थीत आशिल्ले.
सत्रांत वांटेकार जाल्ले प्रभाकर भिडे (गोंय) हांणी सांगलें, जें खपता तेंच विकता. लेखकांची पुस्तकांक जाय तसो खप मेळ, अशीय खंत उक्तायली.
आयज काल लेखक स्वताच आपूण प्रकाशक जातात. ते पुस्तकांच्या दर्ज्या कडेन तडजोड करतात. ताका लागून लेखक आनी प्रकाशकां मदीं संपादकीय समन्वय आसपाची गरज आसा, अशें कवी एच. एम. पेरनाल मेंडोन्सा हांणी मत मांडलें.
वाचन करपा पासत आमी यत्न केल्यार हे प्रस्न सुटावे जातले, अशें पय्यनूर रमेश पै (केरळ) सांगलें.
वाचक वाडोवपा खातीर यत्न जाय : मॅल्वीन
कोंकणी समाज आनी कोंकणी मुखार साबार आव्हानां आसात, कोंकणी समाज पांच प्राशदेशांनी पसरलां. आमचे मुखार 5 लिपींचो प्रस्न आसा. तेन्ना अश्या समाजाक एकठांय बांदून हाडपाक आमी बांदील आसा. आमचे कोंकणीचे वाचक उणें आसात. वाचक वाडोवपाक पासत पालक, शिक्षक, लेखक आनी प्रकाशकांनी यत्न करचो, अशें अध्यक्ष मॅल्वीन रॉड्रिगस (कर्नाटक) हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
