भांगरभूंय | प्रतिनिधी
भांगरभूंय । डीआयपी
पणजीः कोंकणी परिभाशीक शब्दकोश तयार करपा खातीर गोंय सरकाराच्या राजभास संचालनालयान मंगळारा 15 ऑक्टोबराक पर्वरे मंत्रालयांत मुख्यमंत्री डॉ. प्रमोद सावंत हांचे हाजिरेंत केंद्रीय शिक्षण मंत्रालयाच्या विज्ञानीक आनी तंत्रीक उतरावळ आयोगा कडेन समजिकाय कबलात केली.
ह्या वेळार राजभाशा संचालक प्रशांत पी. शिरोडकार, उपसंचालक अनील एच. सावंत, सीएसटीटीचे अध्यक्ष, प्रा. गिरीश नाथ झा, सीएसटीटीचे सहाय्यक संचालक मर्सी हमर, डॉ. अशोक सेलवटकर आनी शालंद्र सिंग तशेंच राजभाशा संचालनालयाचे अधिकारी, सॅबी फर्नांडीस, स्नेहा एस. सबनीस, महाजय एस. गाड आनी हेर अधिकारी हाजीर आशिल्ले.
ह्या वेळार उलयतना मुख्यमंत्र्यान सांगलें, विज्ञानीक आनी तंत्रीक उतरावळ आयोगा कडेन केल्ले समजिकाय कबलातीक लागून गोंयच्या विद्यार्थ्यांक कोंकणी भाशेंत विज्ञानीक उतरांची उतरावळ उपलब्ध जातली. तांकां विज्ञानीक विशय बरे तरेन समजपाक मजत जातली. ह्या कोंकणी परिभाशीक शब्दकोशाचो फायदो शाळांनी आनी उच्च शिक्षणाच्या मळार राष्ट्रीय धोरणाचे अंमलबजावणे खातीर जातलो. तशेंच कोंकणी भाशेची उदरगत जावपाक मजत जातली, अशेंय मुख्यमंत्र्यान सांगलें.
भारतीय भाशांनी तंत्रीक उतरावळ तयार करपाचो सीएसटीटीचो वावर आनी अणभवाची प्रा. गिरीश नाथ झा हांणी म्हायती दिली. गोंयांत ग्रंथ अकादमी स्थापन जावची अशी आस्त तांणी उक्तायली. सीएसटीटी फक्त कोंकणी शब्दकोश करचो ना जाल्यार विद्यार्थ्यां खातीर उपयुक्त सामग्रीय तयार करपाक मजत करतलो, अशें तांणी सांगलें. सीएसटीटीक भारतीय भाशांनी तंत्रीक उतरावळ तयार करपाचो अधिकार आसा. राजभास संचालनालया वांगडा केल्ले हे समजिकाय कबलातीक लागून प्रादेशीक भाशेंत पाठ्यपुस्तकां तयार करपाक आनी भाशांतर तशेंच संशोधनाच्या कामाकूय फायद्याची थारतली, अशें तांणी सांगलें.
ही समजिकाय कबलात करपाक शिक्षण सचीव प्रसाद लोलयेंकार हांची म्हत्वाची भुमिका आसा.
सगळ्या मळा वयल्या तज्ञांची घेतले मजत
विज्ञान, तंत्रज्ञान, कायदो, भूगोल अशा तरेकवार विशयांतली कोंकणी उतरां तयार जातलीं. हे खातीर सगळ्या मला वयल्या तज्ञांची मजत घेतले. लेखक, शिक्षक, इतिहासतज्ञ, विद्यापीठांतले प्राध्यापक, समिक्षक, अणकारकार हांची वळेरी (एम्पेनलमेंट) तयार जातली. इंग्लिशेंतल्या उतराक कोंकणी उतर मेळ्ळे उपरांत तें उतर संकेतथळाचेर घालतले. उतराक हरकती घेवपाची मेकळीक आसतली, अशी म्हायती राजभास संचालनालयातल्या अधिकाऱ्यां कडल्यान मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
