कोंकणी नाटक सर्तींत ‘हिडोनिस्ट’ पयलें

भांगरभूंय | प्रतिनिधी

‘काणी तशी जुनीच… पूण’ दुसरें, ‘अस्तुरी’ तिसरें

भांगरभूंय । प्रतिनिधी

सांखळी :  रवींद्र भवन सांखळी आनी गोवा कोंकणी अकादेमी हांच्या जोडपालवान सांखळेच्या रवींद्र भवनांत आयोजीत केल्ल्या पयल्या सत्तरी आनी दिवचल म्हाल पांवड्याचेर कोंकणी नाटक सर्तींत पयलें इनाम नाट्यरंग क्रिएशन नार्वेच्या ‘हिडोनिस्ट’ नाटकाक फावो जालें. सर्तींतलें दुसरें इनाम श्री सांतेरी कला मंच सत्तरी हांच्या ‘काणी तशी जुनीच… पूण’ जाल्यार तिसरें इनाम भूमी प्रकाशन सावर्शे सत्तरी हांच्या ‘अस्तुरी’ ह्या नाटकान मेळयलें. उमेद वाडोवपी इनाम श्री निरंकारी कला मंच बांबर सत्तरी हांणी सादर केल्ल्या ‘काळमाया’ नाटकाक फावो जालें.

सर्तींतलें उत्कृश्ट दिग्दर्शनाचें पयलें इनाम नितीन शिवराम नायक (हिडोनिस्ट), दुसरें इनाम शाबलो गांवकार (काणी तशी जुनीच… पूण) आनी तिसरें इनाम संपदा गांवस (अस्तुरी) हांकां फावो जालें.

उत्कृश्ट अभिनेत्याचें पयलें इनाम रामा गांवस (आदमिनीसत्रोदोर/ मिरांद, होमखण) हाका जाल्यार दुसरें इनाम मिलिंद बर्वे (महेंद्र, हिडोनिस्ट) हांकां फावो जालें. उत्कृश्ट अभिनेत्रीचें पयलें इनाम चैती कडकडे (मीना, हिडोनिस्ट) आनी दुसरें इनाम दिव्या गांवस (सासाय, काणी तशी जुनीच… पूण) हांकां फावो जालें.

उत्कृश्ट नेपथ्याचें पयलें इनाम महादेव बोर्डेकार (काणी तशी जुनीच… पूण) आनी दुसरें इनाम देवराज माजीक (अस्तुरी) हाका फावो जालें. उजवाड येवजणेचें पयलें इनाम उमेश कारबोटकार (हिडोनिस्ट) आनी दुसरें इनाम किरण बर्वे (तोणी) हाका फावो जालें. वेशभुशे खातीरचें पयलें इनाम प्रज्योत माळशेकार (काळमाया) आनी दुसरें इनाम पुंडलीक गांवस (होमखण) हाका मेळ्ळें. रंगभुशेचें पयलें इनाम अंकुश ओझरेकार (काळमाया) आनी दुसरें इनाम दिलखुश गुरव) हाका दिलें. पार्श्वसंगिताचें पयलें इनाम गौतम गांवस (काणी तशी जुनीच… पूण) आनी दुसरें इनाम दुर्वेश उसपकार (हिडोनिस्ट) हाका फावो जालें. लेखनाचें पयलें इनाम डॉ. प्रकाश वजरीकार (भविश्यपुराण) आनी दुसरें इनाम वैभव कवळेंकार (तोणी) हांकां फावो जालें.

अभिनया खातीर प्रशस्तीपत्रां अभिनेत्यां मदीं आकाश चौकोळकार (नेळकार नायक), गौतम गोवेकार (रवळू), राम ओझरेकार (जत म्हणपी), वैभव सावळे (घोवयो), संघर्ष वळवयकार (प्रजय), सिद्धेश गांवस (रंगाचार्य), संदीप किंजवडेकार (सिकंदर) जाल्यार अभिनेत्रीं मदीं मनीषा परब (अस्तुरी), आरती माटणेकार (व्हडली), मारिटा डिसोझा (सानविका), डॉ. श्रृती सावंत (डॉ. शमी प्रियोळकार), तृप्ती रेडकार (आबोली), सीमा गांवस (नक्षलवादी चली) ह्या कलाकारांक भेटयलीं.

नाटक सर्तीचो इनामां भेटवण सुवाळो सांखळेच्या रवींद्र भवनाच्या मुख्य सभाघरांत जालो. ह्या वेळार मुखेल सोयरी म्हूण पद्मिनी फावंडेशनाची अध्यक्ष सुलक्षणा सावंत, कोंकणी नाटक संगीत अकादमीचे अध्यक्ष श्रीधर कामत बांबोळकार, गोवा कोंकणी अकादेमीचे अध्यक्ष डॉ. पूर्णानंद च्यारी, रवींद्र भवनाचे उपाध्यक्ष दत्ताराम चिमुलकार, लेखक डॉ. प्रकाश वजरीकार, झिलू गांवकार, संचालक शोधन कोळमुळे, शशिकांत नार्वेकार, स्नेहा देसाय, श्रीरंग सावळ, अमोल बेतकीकार, रविराज च्यारी आनी हेर मानेस्त हाजीर आशिल्ले.

नाटक सर्त खुबूच दर्जेदार आशिल्ली. हे सर्तीक लागून दिवचल आनी सत्तरी म्हालांतले नाट्य कलाकार मुखेल प्रवाहांत आयले. हाचे उपरांतूय तांणी अशींच दर्जेदार नाटकां प्रेक्षकांक दिवचीं, अशें श्रीधर कामत बांबोळकार हांणी सांगलें.

फाटल्या वर्सभरांत अशे पद्दतीन खूबश्यो कार्यावळी, सर्ती आयोजीत करून गांवांतल्या सुप्तगूण आशिल्ल्या कलाकारांक मुखेल प्रवाहांत हाडपाचो यत्न रवींद्र भवन सांखळीन केला. हाका मुख्यमंत्री डॉ. प्रमोद सावंत हांचें मोलाचो आदार मेळटा. वयर सरपी कलाकारांनी रवींद्र भवनाचे माचयेचो लाव घेवचो, अशें दत्ताराम चिमुलकार हांणी सांगलें.

पयल्याच कोंकणी नाटक सर्तीक बरो प्रतिसाद मेळ्ळो. हे सर्तींत कांय उणाव आनी चुकी आशिल्ल्याचें खूब जाणांनी नदरेक हाडून दिलां. त्यो चुकी सुदारून फुडारांत हे सर्तीचो दर्जो आनीक वाडोवपाचो यत्न करतले, अशें डॉ. पूर्णानंद च्यारी हांणी सांगलें. नाटक सर्तीचें परिक्षण श्रीधर कामत बांबोळकार, अशोक नायक आनी हिरू नायक हांणी केलें. सर्तींत वट्ट 15 नाटकां सादर जालीं. ज्या नाटकांक 35 टक्क्यां परस चड गूण मेळ्ळे तांकां आयोजकां वतीन मानधन दिलें.

गांवाची संस्कृती नाटकां वरवीं दिसता : सुलक्षणा सावंत

गांवागांवांत अशे पद्दतीन नाट्यकला सादर करपी खूबश्या चल्या- चलयां खातीर अशे तरेच्या सर्तींतल्यान वेवसायीक नाटकांत प्रवेश करचे खातीर माची मेळटा. गांवांतल्या अश्या नाट्यसंस्ता वतीन निर्मीत जावपी नाटकांतल्यान खूबशे कलाकार तयार जातात. आपल्या गांवची संस्कृती, परंपरा नाट्य कलेच्या माध्यमांतल्यान सादर जाता. ताका लागून युवा पिळगी आपली संस्कृती नकळटा आपले मदीं आस्पावन घेता. ही नाटकाची फलश्रृती आसा, अशें सुलक्षणा सावंत हांणी सांगलें.