भांगरभूंय | प्रतिनिधी
पणजी : डॉ. सुश्रुत मार्टिन्स मेमोरियल ट्रस्ट हांचे वतीन स्थापीत केल्लो ‘कोंकणी झुजारी डॉ. सुश्रुत मार्टिन्स यादस्तीक पुरस्कार’ ह्या वर्सा कोंकणी वावुरपी आर. बी. एस. कोमरपंत हांकां तांच्या कोंकणी भाशा आनी संस्कृतीची मान्यताय, उदरगत आनी प्रचाराच्या योगदाना खातीर दितले. ‘कोंकणी झुजारी डॉ. सुश्रुत मार्टिन्स स्मृती पुरस्कार’ हो भाशा, संस्कृती आनी समाजीक न्याया खातीर आशिल्ले जापसालदारकेचें दायज फुडें व्हरपी वावुरप्यांचो भोवमान करपाचो येत्न आसा.
हो पुरस्कार वितरण सुवाळो संजना पब्लिकेशन्स हांणी 30 डिसेंबर 2025 दिसा पर्वरेच्या थॉमस स्टिफन्स कोंकणी केंद्रांत आयोजीत केला. हे कार्यावळीक अध्यक्ष म्हूण नामनेचे लेखक आनी कोंकणी म्हालगडे ॲड. उदय भेंब्रे, जाल्यार नामनेचे साहित्यीक आनी कार्यकर्ते अरविंद भाटीकार मुखेल सोयरे म्हूण हाजीर रावतले.
सुत्रसंचालन फामाद गायक आनी नेहरू युवा केंद्र, उत्तर गोंयचे आदले मुखेली शिरीश लवंदे करतले.
कार्यावळीची सुरवात सांजे 4 वरांचेर निमंत्रीत कवींच्या कवी संमेलनान जातली. ह्या काव्य सत्राचे अध्यक्ष प्रकाश दत्ताराम नायक आसतले. तातूंत रमेश घाडी, उर्जिता भोबे, शशिकांत पुनाजी, विवेक पिसुर्लेंकार आनी ग्वादालूप डायस वांटेकार जातले. 5 वरांचेर पुरस्कार भेटवण सुवाळो जातलो.
स्मृतिशेश डॉ. सुश्रुत मार्टिन्स हो गोंयच्या समाजीक-संस्कृतीक आनी राजकी चळवळींतलो एक खडेगांठ फुडारी. गोंयच्या विद्यार्थी चळवळींत सक्रीय डॉ. मार्टिन्स अखील गोंय युवा महासंघाचो संस्थापक आशिल्ले आनी समाजीक आनी संस्कृतीक कार्या खातीर तरणाट्यांक संघटीत करपाक तांची मोलादीक भुमिका आशिल्ली.
कोंकणी प्रजेचो आवाजाच्या फुडारपणा खाला कोंकणीक गोंयची राजभास म्हूण मान्यताय मेळवपा खातीर आनी गोंयांक राज्य म्हूण मान्यताय मेळवपा खातीर जाल्ल्या इतिहासिक आंदोलनांनी ते मुखार आशिल्ले.
एक कट्टर पर्यावरण वावुरपी म्हूण, डॉ. मार्टिन्स हांणी गोंयचें पर्यावरण राखपा खातीर खूब संघर्श केलो आनी खुबश्या जन आंदोलनांचें फुडारपण केलें. कोंकणी भाशा मंडळाचे अध्यक्ष म्हूण तांणी मडगांवच्या कोंकणी भवनाचे स्थापणुकेंत म्हत्वाचें योगदान दिलां. ते ‘व्हिजन इंडिया’ ह्या देशांतल्या तरणाट्यांक सक्षम करपा खातीर समर्पीत आशिल्ले चळवळीचे संस्थापक आशिल्ले.
डॉ. सुश्रुत मार्टिन्स मेमोरियल ट्रस्टा वतीन जनता आनी कोंकणी भाशा आनी साहित्य मोगींक हे कार्यावळीक हाजीर रावपा खातीर विश्वस्त डॉ. बिना मार्टिन्स हांणी आवाहन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
