भांगरभूंय | प्रतिनिधी
पणजी : कोंकणी अध्ययनशाखा, शणै गोंयबाब भाशा आनी साहित्य महाशाला- गोंय विद्यापीठ आनी थॉमस स्टिवन्स कोंकणी केंद्र, पर्वरी हांच्या जोड पालवान बुधवार 15 जानेवारी ह्या दिसा ‘कोंकणी चळवळींत म्हालगड्यांचें योगदान’ ह्या विशयाचेर पुराय एका दिसाची व्याख्यानमाळ आयोजीत केल्या.
कोंकणी चळवळींत म्हत्वाचें योगदान दिल्ल्या मुखेल म्हालगड्यांची नव्या विद्यार्थ्यांक तशेंच संशोधकांक सविस्तर वळख जावची ह्या हेतून व्याख्यानमाळेचें आयोजन केलां. ही व्याख्यानमाळ दर वर्सा आयोजीत करून संबंदीत मळार योगदान दिल्ल्या म्हालगड्यांच्या कार्याचो एक डिजिटल आनी छापील दस्तावेज सुगूर करून दवरपाचो विचार आसा. हीं साबार व्याख्यानां रितसर रिकॉर्ड करून ‘कोंकणी लॅक्चर बँक’ नांवाचे संकल्पनेक मुखार व्हरपाचो महत्वाकांक्षी प्रकल्प नदरे मुखार दवरला.
हे व्याख्यानमाळेचें उक्तावण विद्यापीठाच्या सेमिनार हॉल- बी ब्लॉकांत सकाळीं 10 वरांचेर शणै गोंयबाब भाशा आनी साहित्य महाशालेची अधिश्टाता प्रो. अनुराधा वागळे हांचे हस्तुकीं जातलें. ह्या वेळार थॉमस स्टिवन्स कोंकणी केंद्राचे संचालक डॉ. पांडुरंग फळदेसाय तशेंच कोंकणी अध्ययनशाखेचे संचालक डॉ. हनुमंत चोपडेकार हाजीर आसतले.
व्याख्यानमाळेंत विद्याप्रबोधिनी महाविद्यालयाचे प्राचार्य प्रो. भुषण भावे सकाळीं 11 ते 12 वरां मजगतीं ‘पाद्री थॉमस स्टिवन्स हांचें कोंकणी पासत योगदान’ ह्या विशयाचेर व्याख्यान दितले. दनपारां 12 ते 1 वरां मजगतीं ‘मों. से. रूदोल्फ दाल्गाद हांचें कोंकणी पासत योगदान’ ह्या विशयाचेर डॉ. (फा.) लुईश गोमिश हांचें व्याख्यान आसतले.
जेवणा उपरांतच्या सत्रांत दनपारां 2 वरांचेर गोवा कला अकादमी थिएटर आर्ट महाविद्यालयाचे प्राचार्य प्रो. राजय पवार ‘डॉ. मनोहरराय सरदेसाय हांचें कोंकणी पासत योगदान’ ह्या विशयाचेर व्याख्यान दितले जाल्यार दनपारां 3 वरांचेर ‘चंद्रकांत केणी हांचें कोंकणी पासत योगदान’ ह्या विशायाचेर पत्रकार अनिल पै व्याख्यान सादर करतले.
समारोप सत्रांत धेंपे कला आनी वाणिज्य महाविद्यालयाच्या कोंकणी विभागाची मुखेली अंजू साखरदांडे निरिक्षक म्हूण पुराय व्याख्यानमाळेचेर नियाळ सादर करतली. जाल्यार आकाश गांवकार, फा. मिल्टन रोड्रिगीस, दीपराज सातार्डेकार आनी मानसी धाऊसकार अनुक्रमान साबार सत्रांचें संयोजन करतलीं.
हे व्याख्यानमाळेक राज्यांतले शिक्षक आनी विद्यार्थ्यांनी व्हडा संख्येन उपस्थीत रावचें, अशें आवाहन थॉमस स्टिवन्स कोंकणी केंद्र आनी गोंय विद्यापिठाचे कोंकणी अध्ययन शाखेन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
