भांगरभूंय | प्रतिनिधी
डिलायला लोबो: दाल्गोद कोंकणी अकादमीन कोंकणी चलचित्र दीस मनयलो
पणजी: कोंकणी चलचित्राचें दायज गोंयकारांनी सांबाळपाची गरज आसा अशें गोवा मनरिजवण सोसयटीची उपाध्यक्ष आनी शिवोली मतदार संघाची आमदार डिलायला लोबो हिणें सागंलें. दाल्गोद कोंकणी अकादमी आनी गोवा मनरिजवण सोसयटीचे (ईसीजी) वतीन कोंकणी चलचित्र दीस व्हडा उमेदीन मनयलो. ह्या वेळार आमदार लोबो मुखेल सोयरी ह्या नात्यान उलयताली.
पणजेच्या एम्. पॅलेसिच्या सभाघरांत हो सुवाळो जालो. ह्या वेळार आमदार लोबोचे हस्तुकीं ‘सोलकडी’ चलचित्राचे दिग्दर्शक निलेश मालकार, प्रोड्सुसर मिचेल मास्करेनस, अभिनेतो कॅवीन डिमेलो, अभिनेत्री सोनम मोरजकार हांचो शाल, फुलां आनी यादस्तीक भेटोवन भोवमान केलो.
ह्या वेळार डिकेएचे अध्यक्ष सेल्सो फेर्नांडीस, उपाध्यक्ष विलियम्स फेर्नांडीस, सचीव मायरन जेसन बार्रेटो, भांडारी आफोन्सो ब्रागांझ आनी लेखक आनी आदले सभापती तोमाझीन कार्दोज हाजीर आशिल्ले.
फुडारांत गोवा मनरिजवण सोसयटीचे (ईसीजी) वतीन कोंकणी आनी मराठी चलचित्रां गांवां- गांवांनी दाखयतलीं. हे विशीं मुख्यमंत्री सांवत हांचे लांगीं आपली उलोवणी जाल्या. तशेंच कोंकणी ही आमची गोड भास तिची राखण करपाक आमी जाय. चडांत चड भुरग्यांनी कोंकणी उलोवपाक जाय. त्या पासत आमचो फुडारांत सदांच कोंकणी सिनेमाक तेंको आसतलो. मोगाचो आंवडो हो पयलो कोंकणी सिनेमा आमचें दायज. ते चलचित्रांचो सांबाळ करपाक दाल्गाद कोंकणी अकादमीन आमकां सहकार्य करचें असो उलो आमदार लोबोन मारलो.
कोंकणीचो पयलें चलचित्र ‘मोगाचो आंवडो’ जावन आसा. 24 एप्रील 1950 हे वर्सा मुंबंयत तें दिग्दर्शीत जालें. तेन्ना ए.एल जॅरी हो कोंकणी सिनेमाचो पयलो फादर जावन आसात. देखून फुडारांत दाल्गाद अकादमीन जॅरीच्या नांवांन हो कोंकणी सिनेमा दीस म्हूण मनोवपाचो अशी आपली मागणी आसा म्हणपाचें लेखक आनी आदले सभापती तोमाझीन कार्दोज हांणी आपल्या उलोवपांत म्हणलें.
सुरवातेक मानेस्कांक येवकार डिकेएचे अध्यक्ष सेल्सो फेर्नांडिसान दिलो. हे कार्यावळीचें सुत्रसंचालन ग्लेडीस मेंडोसा हिणें केलें. उपकार सचीव मायरन जेसन बार्रेटो हांणी मानले.
निमाणें सोल कडी हो कोंकणी सिनेमा दाखयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
