भांगरभूंय | प्रतिनिधी
युरी आलेमांवः मनोहरराय सरदेसाय जयंती दिसा भाजपा सरकाराक उलो
भांगरभूंय । प्रतिनिधी
मडगांवः कोंकणी उलय, कोंकणी बरय, कोंकणींतल्यान सरकार चलय, हें ब्रीदवाक्य आचरणांत हाडून नामनेचे कवी मनोहरराय सरदेसाय हांची जल्मशती मनोवया. मुख्यमंत्री डॉ. प्रमोद सावंत आनी भाजपा सरकारान कोंकणी खातीर जागे जावचें, असो उलो विरोधी पक्ष फुडारी युरी आलेमांव हांणी मारलो. नामनेचे कोंकणी कवी मनोहरराय सरदेसाय हांचे 100 वे जयंती निमतान युरी हांणी तांचो उगडास केलो.
मनोहरराय सरदेसाय हांचो जल्म 18 जानेवारी 1925 ह्या दिसा जालो. साहित्य अकादेमी पुरस्कार जैतिवंत गोंयच्या म्हान कवीचें जल्मशती वर्स सुरू जाता. गोंय सरकारान हें वर्स राजभाशा कायद्याची प्रभावी अंमलबजावणी करून मनोवपाक जाय, अशें युरी आलेमांव हांणी सांगलें.
म्हान कवी आनी साहित्यीक मनोहरराय सरदेसाय हांची शती वर्स मनोवपा खातीर भाजपा सरकारा कडेन इल्लो तरी निधी उपलब्ध आसतलो, अशी आस्त आसा. गरजे भायले इव्हेंट आयोजीत करिनासतना, आयचे तरणे पिळगेक मनोहरराय सरदेसाय हांणी साहित्य मळार दिल्ल्या मोलादीक योगदानाची म्हायती करून दिवपी कार्यावळीच आयोजीत करच्यो, असोय उलो युरी हांणी मुख्यमंत्र्यांक मारला.
आयज फक्त इव्हेंट आयोजनाच्या ध्यासान गुल्ल जाल्लें भाजपा सरकाराक म्हान गोंयकारांचो विसर पडला, हें दुर्दैव. गोंय सरकारान आयज मनोहरराय सरदेसाय हांच्या उगडासा खातीर एक अधिकृत कार्यावळ आयोजीत करपाक जाय आशिल्लो, अशेंय युरी हांणी सांगलें. गोंय सरकाराच्या कला आनी संस्कृती खात्यान कला, संस्कृती आनी साहित्य मळार योगदान दिल्ल्या सगळ्या म्हान गोंयकारांचे जिणेंतल्या म्हत्वाच्या तारख्यां सयत एक कॅलेंडर तयार करचें, अशी मागणी युरी हांणी केली.
गोंयची अस्मिताय परतून एकदां धोक्यांत
मनोहरराय सरदेसाय हांच्या ‘गोंयकारांनो जायात जागे’ हे कवितेंतल्या दरेका उतरांतल्यान आमी प्रेरणा घेवन मुखार वचपाचो वेळ आयला. भाजपा सरकारान आपल्या लोकविरोधी धोरणांनी सैमान नटिल्लें गोंय नश्ट करपाचो यत्न केल्ल्यान गोंयची अस्मिताय परतून एकदां धोक्यांत आयल्या. गोंय वाटावपा खातीर गोंयकारांनी परतून एकदां उठून उबे रावप गरजेचें आसा, अशें युरी आलेमांव हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
