भांगरभूंय | प्रतिनिधी
फाटल्या 40 वयर वर्सां थावन घांटमाथ्या वयल्या कोंकणी क्रिस्तांव समाजांक एकठांय हाडपी एक लोकप्रीय परंपरा चालू दवरून कोल्हापूर, गडहिंग्लज, आजरा, इचलकरंजी, बेळगांव, खानापूर आनी शेजारच्या वाठारांतल्या शेंकड्यांनी भावार्त्यांनी शुक्रारा आनी शेनवारा पोरणे गोंयची 44वी वर्सुकी पदयात्रा सुरू केली. अनुकूल, शीतल हवामान आनी वाडट्या सहभागाक लागून 2 डिसेंबराक सुमार एक हजार पदयात्री गोंयचो सायब सांत फ्रांसिस शावेराच्या दर्शना खातीर आनी ताचे आशीर्वाद घेवपा खातीर पोरण्यां गोंयांत पावपाची अपेक्षा आसा.
कोल्हापूर, गडहिंग्लज आनी इचलकरंजीच्या सुमार शंबर यात्रेकरुंच्या पंगडान शुक्रारा आपलो प्रवास सुरू केलो. “आमी गडहिंग्लज थावन आमची पदयात्रा सुरु केली आनी शुक्रारा राती नेसरीच्या सेंट फ्रांसिस झेवियर इगर्जेंत रावले, उपरांत पोरण्या गोंयांत पावचे पयलीं हेरे, भेडशी आनी दिवचल हांगा आमचे फुडले मुक्काम आसतले आनी 2 डिसेंबर दिसा आमी ओल्ड गोंया पावतले अशें कार्यकर्ते आनी लेखक तसेच पदयात्री यात्रेकरू संजय डिक्रुझ हाणी सांगले. आयतार दिसा हे पदयातत्री इतिहासीक आनी आव्हानात्मक रामघाट मार्ग हुंपतले.
आजरा, बेळगाव आनी खानापूरांतल्या पंगडानी शेनवारा आपली पदयात्रा सुरू केली. बेळगांव आनी खानापूर चे पदयात्री जांबोटी, चोरला आनी साखळी हांगा मुक्काम करतले. ह्या तीर्थयात्रेच्या समावेशक भावने प्रमाण सवदत्तीचो (बेळगांव) एक व्हड पंगड- हेर धर्मांतले भक्त पदयात्रेत शुक्रारा भायर सरला.
जायते यात्रेकरू ‘आंगवण’ भेटोवंक तर कांयजाण तीं आंगवण पुराय करपाक, उपकार मानपाक वा आपलो भावार्त खोलायेन वाडोवपाक हो लांब प्रवास करतात. भक्तांनी चड करून ह्या भोंवडेचें वर्णन आध्यात्मिक नदरेन उर्बा दिवपी आनी मानसीक कायाकल्प करपी अशें केलां. तशेंच मुंबय, पुणे, बेंगळुरू आनी ताचे भायर आशिल्ल्या शारांतल्यान हे नीज गोंयकार हे यात्रेंत वांटो घेतात. मागीर हे भावार्ती आपल्या मूळ गांवांनी परतून वतात.
कोल्हापूर, अजरा, गडहिंग्लज, बेळगांव आनी भोंवतणच्या वाठारांतल्या इगर्जांनी आनी कपेलांनी 3 डिसेंबराक सांत फ्रान्सिस शावियेराच्या फेस्ता निमतान खाशेलें मिस आनी प्रार्थना सेवा घडोवन हाडटले.
सुमार एक शेंकडो आदीं गोंयच्या वसणूककारांनी स्थापन केल्ली बेळगांवातली सेंट फ्रांसिस झेवियर असोसिएशन इमाकुलेट कॉन्सेप्शन इगर्जेंत (गोंयची इगर्ज) कोंकणी मीस भेटयतले. खानापूर, हुब्बल्ली-धारवाड आनी बेळगांव डायोसीजींतल्या इगर्जांनीय फेस्त दिसा खाशेली भक्ती आनी गोंयच्या सायबाची आराधना जातली.
लुईस रॉड्रीग्स, बेळगाव
8618643958
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
