कोंकणी केन्ना पावतली नीट परिक्षेंत?

भांगरभूंय | प्रतिनिधी

म्हजे भाशेंत हें कार्य आतां तरी पद्दतशीरपणान सुरू जावचें हो ह्या लेखाचो हेत. रड, पिरगंण, न्हयकारी नायरो घालपाक न्हय. ही तळमळ.

अंदूं वैजकी पदवी परिक्षेच्या नीट चांचणी परिक्षेंत तेरा आवयभाशांतल्यान विद्यार्थ्यांनी पेपर बरयले. दिल्लींतल्या म्हज्या एका मित्रान सविस्तर कोश्टक धाडून दिलें. (लेखांत प्रतिमा दिल्या) ताचेर नदर मारुया. हिंदी (3,28,634), गुजराती (53,025), तामीळ (26,580). ते उपरांत बाकिच्यो भाशा आसात. तातूंत हजार वा शेंकड्यांनी उमेदवारांनी आपले भाशेंत परिक्षा दिल्या तिवूय नोंद दिसता. प्रस्न आंकड्याचो ना. नीट परिक्षा ते ते भाशेंत घेवपाची उतरावळीची सिध्दता तांणी केली हें विशेश. क्यूट म्हळ्यार सेंट्रल युनिवर्सिटी एन्ट्रन्स टॅस्ट चांचणी परिक्षेंत उमेदवारांनी 13 भाशांतल्यान पेपर दिल्यात. क्यूट म्हणजे कितें तेंच मुदलांत कांय जाणांक खबर ना. ती प्रवेश परिक्षा कोंकणींत दिवपाची गजाल मागीरची.
युपीएससी (आयएएस बी) प्रिलिमेक कितल्या जाणांनी कोंकणी घेतिल्ली तें रोखडेंच कळटलें. पूण जीं दोन कोश्टकां आयल्यांत त्या नीट आनी क्यूट परिक्षेंत कोंकणी कोणेंच घेवंक ना. चिंतेचो चिंतनाचो विशय हो.
ह्या परिक्षांनी कोंकणी पावतली जाल्यार पयलीं तंत्रीक उतरावळ तयार आसची पडटली. नीट परिक्षेंत 180 प्रस्नांचो एकूच पेपर आसता. तातूंत फिजिक्स, केमिस्ट्री आनी बायॉलॉजी म्हळ्यार जीवशास्त्र ह्या विशयां वेले प्रस्न आसतात. जाप बरोबर आसल्यार चार मार्क. चुकल्यार वजा एक.
निदान बारावे मेरेन कोंकणीत विज्ञान उतरावळ तयार करप म्हळ्यार गगनां न्हय आनी हाऽ हाऽ हाऽ करीत फकांडां खेबाडां मारीत रावपाचोय तो विशय न्हय. गंभीर विशय हो. खरें म्हळ्यार बांबोळे जेन्ना गोवा विद्यापीठ सुरू जालें तेन्ना कोंकणी विश्वकोश विद्यापिठान हातांत घेतलो. तेन्नाच ही विज्ञानीक उतरावळ हातांत घेवपाची गरज आशिल्ली. कारण दीर्घ काळ, एकवटीत यत्नांचो, कायम सातत्यान चलपी असो हो प्रकल्प. शब्दकोशांत बरीच लवचीकता, Fluidity आसता. नवीं उतरां येतात, माहिती बदलता, अद्ययावत जाता. ते प्रमाण बदल करीत रावचे पडटात. पूण एक समर्थ स्पश्ट दिशा जाय पडटा. धा जाणांनी धा तरांनी विमान चलोवपाचे खेळ न्हय हे.
उतरावळ जाग्यार, निटायेर घालपाची भोव गरज आसा. फोटोसिन्थेसीस म्हळ्यार कितें तें फायनल जावंक जाय. पिगमेंट म्हळ्यार कितें तें निश्चीत जावंक पावतलें. थरमॉडायनॅमिक्स म्हळ्यार कितें तें एकदांचें पक्के करचें पडटलें.
जेन्ना एक उमेदवार आपले भाशेंत नीट परिक्षा बरयता तेन्ना ताचो टनभर परिमाण आनी फरक आसता अशें वेगळ्या वेगळ्या मळां वयल्या जाणकारांनी नोंद केलां. कारण ताचो आत्मविस्वास वाडिल्लो आसता. ताका प्रस्न सेकंदांनी समजता. आकलन बरें जाता. दोंगरी, पयसुल्ल्या, दुर्गम वाठारांतल्या विद्यार्थ्यांक आपले भाशेंत नीट पेपर बरयतना सोंपेंपण येता. तांकां पयलींच इंग्लीशीक लागून गंड उप्राशिल्लो आसता. कितलींशींच दसकां उलगलीं पूण अजून कोंकणींत हें तंत्रीक उतरावळीचें काम जाग्यार घालप जमूंक ना.
हें स्पश्ट व्हिजन आमचे कडेन ना. कार्यावळ ना. एक म्हातारी आशिल्ली. जाण्टी जाल्ली. जाम जाल्ली. खोंपींत एकलीच रावताली. हांथरुणार पडली. एका शेजारच्या तरणाट्याक काकूट आयली. ताणें दोतोराक आपयलो. दोतोरान तिका तपासली. ताणें तपासून सांगलें- तुमी तिका तरेतरेच्यो गुळयो दिवन आनीक मरणपंथाक पावयल्या. तिच्या पोटांत कांयच ना. अन्ना गोटो ना. इल्लो इल्लो पेजे निवोळ दियात. मागीर चार दिसांनी कुयां दियात. तिका कसलीच पिडा ना. पोटांत आलिमेंत ना. तो इल्लो इल्लो दियात. ते प्रमाण सगल्यांनी म्हातारेची कुयदाद घेतली, वखद विरसद केलें. म्हातारी तरतरीत जाली.
क्लियर व्हिजन आशिल्ले पूत म्हातारेक वळवळायनात. सद्या म्हजे भाशेक आलिमेंत जाय तो वेगळ्या वेगळ्या पारिभाशीक कोशांचो. नाजाल्यार कालांतरान फ्राकेज येवं येता. इन-टेक जाय. पोशक द्रव्यां आशिल्लें अन्न जाय. कितें दिवंक जाय हें खबर आसूंक जाय.
दसकां उलगलीं. centripetal force, centrifugal force, absorption, adsorption, colloids, structural formula, neural control, fluid, biomolecule, excretory, cell cycle, tissue culture, morphology, locomotion ह्या मुळाव्या उतरां खातीर कोंकणींत पर्यायी उतरां काडूंक ना. म्हजे भाशेंत हें कार्य आतां तरी पद्दतशीरपणान सुरू जावचें हो ह्या लेखाचो हेत. रड, पिरगंण, न्हयकारी नायरो घालपाक न्हय. ही तळमळ.
आयज मध्य प्रदेशांत आनी हेर कांय वाठारांनी एमबीबीएस ही वैजकी पदवी हिंदींतल्यान घेवपाक मेळटा. केदी झेप ही. केन्ना तरी तांणी हें सपन पळेलें. तें आयज फळाक आयलें. सपनां असलीं पळोवचीं. संस्था ज्यो आसात तांणी व्हडलीं सपनां पळोवचीं. इंधनान भरिल्ली जर स्कुटी आसा जाल्यार सायकलीन पेदालां मारीत कुंडयची चडटी धांपेत खरशेत काडपाची कसलीच गरज ना. सांगपाचें म्हळ्यार जर आयज आमचे कडेन ए आय सारकेलीं टुल्स आसात, संगणक आसात, कांय ऑनलायन तंत्रीक कोश आसात, छापील कोश आसात, विद्वान आसात जाल्यार ताचो वापर करून मुखार पावलां मारूंक जाय. कांय स्वयंघोशीत तज्ञांक एकाच उतराचेर वा मुद्द्याचेर घासाघीस करत तवशें कशें किसणेर घश्टीत रावपाक आवडटा. ते थंयच मुंगरून उरतात, एकाच जाग्यार तालगडी घालीत. असल्या विचित्र भयरोजोळोपांनी घुस्पले जाल्यार काम थंयच उरतलें. कावळे म्हातारे जातले.
परिसंवाद आनीक जाय. चर्चासत्रां खूब जाय. नेमान येवपी नेमाळीं जाय. कादंबऱ्यो आनीक जाय. दाटगुळो 800 पानांच्यो जाय. अभ्यासपूर्ण खोल जाय. नाटकां आनीक जाय. एकांकी जाय. बाल एकांकी जाय. सुवाळे, उत्सव, संमेलनां आनीक जाय. पेपर वाचन जाय. धावी एसएससी परिक्षेंत तिसरी भाशा कोंकणी घेवप्यांचो आंकडो कितलो वाडला, फाटल्या पांच वर्सांतलें ताचें कोश्टक आमच्या मेजार जाय. कारण हो आंकडो आनीक वाडोवंक जाय. पदवी, पदव्युत्तर परिक्षेंत कोंकणी विद्यार्थ्यांचो आंकडो कितलो वाडटा, तें कोश्टक आमच्या हातांत जाय. तो आंकडो वाडत वचूंक जाय.
सामकें म्हत्वाचें. तेच बराबर नीट परिक्षा, युपीएससी परिक्षा कोंकणींतल्यान दिवंक मेळटली ताची तयारी आनी प्रत्यक्ष काम सुरू करूंक जाय. कितलो कळाव जाला तो टेप घेवन मेजून अर्थ ना. आतां- प्रत्यक्ष वावराक हात घालपाची गरज आसा.

मुकेश थळी
फोंडें