भांगरभूंय | प्रतिनिधी
फुडल्या वर्सा हो कोर्स ऑनलायन पद्दतीन चलोवपाचो हावेस
पणजीः गोंय विद्यापिठाच्या कोंकणी कुशळटाय मान्यांकीत कोर्साक बरोच प्रतिसाद मेळटा. कोंकणी खबर नाशिल्ले 17 जाण कोंकणीचे धडे घेतात. हातूंत मोपा विमानतळा वेले अधिकारी, एमबीए पदवीधर आनी निवृत्त लश्कर जवानाचो आस्पाव आसा. फुडल्या वर्सा हो कोर्स ऑनलायन पद्दतीन चलोवपाचो हावेस आमी दवरला, अशें शणै गोंयबाब भाशा आनी साहित्य महाशाळेच्या कोंकणी अध्ययन फांट्याचे संचालक डॉ. हनुमंत चोपडेंकार हांणी सांगलें.
कोंकणी भास, साहित्य आनी संस्कृताये विशीं वेगळ्योवेगळ्यो गजाली वा उपक्रम जावचे हो हावेस दवरून शणै गोंयबाब भाशा आनी साहित्य महाशाळे खाला कोंकणी अध्ययन फांटो वेगळेवेगळे तरेचे उपक्रम राबयता, अशें चोपडेंकार हांणी सांगलें.
हाचोच एक भाग म्हूण गोंयांतले वा हेर राज्यांतले कोंकणी खबर नाशिल्ले मनीस, जांकां कोंकणी भास समजून घेवपाची आनी शिकपाची आवड आसा तांचे खातीर 100 वरांचो प्रमाणपत्र आशिल्लो कोंकणी कुशळटाय कोर्स आमी घडोवन हाडला. शिकोवपाचें माध्यम इंग्लीश आशिल्ल्या कारणान खंयच्याय कोनश्यांत बशिल्लो मनीस कोंकणी शिकपाक शकता, अशें चोपडेंकार हांणी सांगलें.
गोंय विद्यापिठा कडल्यान ह्या कोर्साक शिक्षणीक वर्स 2024-25 खातीर मान्यताय मेळ्ळे उपरांत 26 जून 2024 ह्या दिसा सुरवेक आमी ऑफलायन माध्यमांतल्यान म्हणल्यार विद्यार्थ्यांचे प्रत्यक्ष वर्ग घेवपाक रितसर सुरवात केली. हे फावटी कोंकणी खबर नाशिल्ले 17 विद्यार्थी ह्या कोर्साचो लाव घेतात.
फुडल्या वर्सा हो कोर्स ऑनलायन पद्दतीन घेतले. ते नदरेंतल्यान आमी 70 टक्के अभ्यासक्रम इल्लो इल्लो करून वांट्यांनी स्टुडियोंत रेकॉर्ड केला. कोंकणीच्या मळा वेले जाणकार विद्वान आनी शिक्षक जशे की भूषण भावे, राजय पवार, स्नेहा सबनीस, एडना वाझ, रमा मुरकुटे आनी हांव स्वता मेळून अभ्यासक्रम तयार केला आनी तो गोंय विद्यापिठाचे वॅबसायटीर मेळटा, अशीं म्हायती चोपडेंकार हांणी दिली.
जे विद्यार्थी नोंद जाल्यात आनी हेर बाकिच्याय विद्यार्थ्यांक हो अभ्यासक्रम फुकट पळोवंक मेळटा. एक बॅच आमची चालू आसा. दुसऱ्या बॅचीची प्रक्रिया मार्च सावन सुरू जातली. पुर्तुगालांतल्या लोकांनी लेगीत आमचे कडेन संपर्क सादला आनी ऑनलायन पद्दतीन शिकपाची तयारी दाखयल्या. भारतांतल्यान कांय लोक संपर्क करीत आसात आनी तांचे खातीर हो कोर्स उपलब्ध करून दिला अशें चोपडेंकार हांणी म्हणलें.
सप्तकांतले बुधवार आनी शुक्रार अशे दोन दीस दोन वरां ऑफलायन पद्दतीन आमी शिकयतात. ऑनलायन पद्दत आसा ती लोकांच्या सोयीच्या वेळा प्रमाण घेवं येता. एखादी व्यक्ती कामांत आसत जाल्यार सांजवेळार तांकां वांटेकार जावंक मेळटलें. सद्या गोंयांत कोंकणी खबर नाशिल्ले मोपा विमानतळा वेले दोन अधिकारी, उंचेल्या पांवड्या वेले एमबीए पदवीधर, दोन वकील, हेर भाशेंत शिकोवपी विद्यापिठांतले दोन म्हणयारे, वेगळ्या विभागांत शिकपी विद्यार्थी आनी एक निवृत्त लश्कर अधिकारी हांचो आस्पाव आसा. ऑनलायन जातकच संख्या व्हड प्रमाणांत वाडटली, असो हावेस चोपडेंकार हांणी उक्तायलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.