कोंकणी उलय, बरय, वाच

भांगरभूंय | प्रतिनिधी

डाॅ. प्रमोद सावंत,

मुख्यमंत्री, 

नमस्कार, 

आवयभास, राजभाशा कोंकणी वाचात, बरयात, उलयात अशें युवांक सांगप चालूच दवरचें. गोंयच्या अधिकारी, कर्मचाऱ्यांकय कोंकणी उलय, बरय, वाच हें सांगपाक जाय. तुमी कोंकणी बेस बरी उलयतात हें साहित्यिक, कोंकणीचे म्हालगडे उदयबाब भेंब्रे हांचें मत. राज्य पावंड्या वयल्यो कार्यावळी कोंकणींतल्यान जावच्यो. तक्टे, बॅनर्स, पोस्टर्स, पॅनल्स राजभाशेंतल्यान जावचे ही जतनाय घेवपाची गरज आसा. तुमचे कडेन राजभाशा खातें आसा, सगल्या सरकारी खात्यांक राजभाशेचो सांबाळ करपा पासत नेमावळ घालून दियात. नेमावळीक पाळो दिवपाक फाटल्यान लागचें पडटलें. 

कोंकणी उलय, कोंकणी बरय ह्या उतरांनी राजभाशा आंदोलनाक बळगें दिल्लें. कोंकणीक राजभाशेचो पावंडो मेळ्ळ्या उपरांत राजभाशेंतल्यान विंगड विंगड प्रकारांतल्या साहित्याची निर्मणी जाल्या, दोन ज्ञानपीठांय गोंयांक मेळ्ळ्यांत. आनीकय ज्ञानपीठां राजभाशा कोंकणीच मेळोवन दितली. ते तांकीचे साहित्यिक राज्यांत आसात. समाजांत जावपी बदलांचें पडबिंब कोंकणी साहित्यांत दिसता. 

कोंकणींतल्यान उलोवप, बरोवप, वाचप, शिकप आजच्या खिणाक गरजेचें. आवयभास शिकपी वाडत आसात, मनीसबळ तयार जायत आसा. राजभाशाच स्थलांतराक आळेबंद हाडूंक शकता, हेंय सत. राजभाशा कोंकणी पोटाची भास जाता तेन्ना तिका म्हत्व येता, तंत्रज्ञानांतल्यान ती संवसाराच्या खांची कोनशाक पावता. मागीर गोंयकार अधिकारी उलोवपाक कित्याक अनमनतात? सरकारी, पक्षाच्या, खासगी कार्यावळींत मुख्यमंत्री ह्या नात्यान तुमी कोंकणीतल्यान उलोवन राजभाशे विशीं आशिल्ली लागणूक दाखोवन दिल्या. राजभाशेंतल्यान उलोवन जी खोस तुमकां जाता ती तुमच्या मुखामळारय दिसता. हाचेफुडेंय तेंच धोरण आपणावचें. आवयभास, राजभाशा कोंकणी तुमकांच न्हय राज्याकय व्हड करतली. कोंकणीक, गोंयचे राजभाशेक अभिजात भाशेचो पावंडो मेळोवन दिवपापासत यत्न जातले, अशी आस्त आसा. 

सुहासिनी प्रभुगांवकार