कोंकणी उलयात, वाचात, बरयात

भांगरभूंय | प्रतिनिधी

कोंकणीक न्याय दिवपाचो यत्न : मुख्यमंत्री

कोंकणी खातीर काम करपाचो उलो

दिवचले मनयली शणै गोंयबाब जयंती

भांगरभूंय । प्रतिनिधी

दिवचल : कोंकणी उलयात, वाचात, बरयात. कोंकणी खातीर काम करात. तें जावचें म्हणून भुरग्यांक उर्बा दियात. आवयभाशेचें शिक्षण घेवप गरजेचें आसा. खंयचेच भाशेचो दुस्वास करिनासतना गोंय सरकारान सगळ्या भाशांक सगळे तरेचो आदार केला. फाटलीं 50 वर्सां कोणाक जालें असो वावर कोंकणी संबंदांत फाटल्या स वर्सांत मुख्यमंत्री ह्या नात्यान हांवें केला. कोंकणी – मराठीचेर कसलेच तरेचो अन्याय करिनासतना सरकार सगळे तरेची मजत करपाक बांदील आसा, अशें मुख्यमंत्री डॉ. प्रमोद सावंत हांणी सांगलें. दिवचले शणै गोंयबाब जयंती उत्सव कार्यावळींत ते उलयताले.

हिराबाई झांट्ये सभाघरांत आयोजीत केल्ले कार्यावळींत आमदार डॉ. चंद्रकांत शेट्ये, कोंकणी सल्लागार मंडळ साहित्य अकादमी दिल्लीचे मॅल्वीन रॉड्रिगीज, नगराध्यक्ष विजयकुमार नाटेकार, पूर्णानंद च्यारी, येवकार अध्यक्ष प्रशांत चणेकार, सचीव पराग नगर्सेकार,  अनील सावंत, दिवचल कोंकणी सेवा केंद्राचे अध्यक्ष रुपेश ठाणेकार, डॉ. प्रवीण सावंत आनी हेर मानेस्त उपस्थीत आशिल्ले.

नवे साहित्यीक निर्माण जावपाची गरज आसा. ते खातीर वाचन, चिंतन गरजेचें आसा. विकसीत भारताचें सपन साकार करचे खातीर थळाव्या भाशांक म्हत्व दिलां. नव्या शिक्षणीक धोरणांत ताचो आस्पाव केला. आवयभाशेक उर्बा दितना सगल्यांक समान न्याय दिवपाचो यत्न आपल्या सरकारान केला. नवयुवकांनी आवयभाशेच्या रक्षणा खातीर लेखन, वाचन, मनन, चिंतन करप गरजेचें आसा. सरकार ते खातीर सगळे तरेची मजत करपाक बांदील आसा. स वर्सांच्या काळांत कोंकणी भाशेक न्याय दिवपाचो प्रामाणीक यत्न केला, हाचो अर्थ मराठीक आमी खंयच उणाक लेखूंक ना. ते खातीर कोणेच भाशेचो दुस्वास करिनासतना आवयभाशेच्या रक्षणा खातीर सगल्यांनी योगदान दिवचें. सरकार ह्या भाशांच्या उत्कर्शा खातीर सदांच बांदील आसा, अशें मुख्यमंत्र्यान सांगलें.

आमदार डॉ. चंद्रकांत शेट्ये हांणी सांगलें, शणै गोंयबाब हांच्या वावराचें व्हडपण पुराय भारतभर आसा. कोंकणी भाशेची सेवा करतना तांणी समाजीक योगदान लेगीत दिलां. कोंकणीची अस्मिताय, स्वाभिमान दागरूक करतना दर्जेदार लेखन आनी संशोधन करून कोंकणी भाशा व्हड उंचायेर व्हरपाक शणै गोंयबाब हांचें व्हड योगदान आसा, अशें तांणी स्पश्ट केलें.

ह्या वेळार मुख्यमंत्र्यांचे हस्तुकीं कोंकणी भाशे खातीर योगदान दिवपी उद्देजक सुगत्त मांद्रेंकार, मुकेश थळी, विनायक गोवेकार तशेंच डॉ. पूर्णानंद च्यारी हांचो शाल, नाल्ल आनी यादस्तीक चिन्न दिवन सत्कार केलो.

येवकार अध्यक्ष प्रशांत चणेकार हांणी सांगलें, शणै गोंयबाब हे युगपुरूस आशिल्ले. तांणी अस्मिताय जागयतना कोंकणी भाशेक व्हड उंचाय मेळोवन दिली. कोंकणी भाशेचें संशोधन करतना तांणी लेखन करून कोंकणी भाशा विकसीत करपाचो मोलाचो वावर केलो.

मॅल्वीन रॉड्रिगीज हांणी सांगलें, शणै गोंयबाब हांचो वावर म्हान आसा. कोंकणीचें सत्व वळखुपी ते युगपुरूस आसात. तांणी संशोधनात्मक साहित्य रचलें, तितलें आनीक कोणेच काण करूंक ना. खूब वर्सांची तपश्चर्या, त्याग हाकाच लागून कोंकणीचें वैभव वाडोवचे खातीर युवा पिळगेन नव साहित्याची निर्मिती करून कोंकणी खातीर दर्जेदार साहित्याक तयार करचें, असो तांणी उलो मारलो.

डॉ. पूर्णानंद च्यारी हांणी सांगलें, दिवचलेन कोंकणीक खूब कितें दिलां. अस्मिताय, चैतन्य येतना स्वाभिमान जागरूक केला. स्वाभिमान, अभिमानाचें दुसरें रूप म्हणल्यारय शणै गोंयबाब. कोंकणी भाशेचो स्वाभिमान जागरूक करपाचें व्हड काम तांणी केलां. आपल्या कर्तृत्वान शणै गोंयबाब हांणी कोंकणीचो बावटो सगळे कडेन हुबयतना संशोधन पद्दतीन लेखन करून भाशेक व्हड उंचाय मेळोवन दिली. कोंकणी भाशेची सेवा करतना हेर भाशांचो दुस्वास करिनासतना आमकां कोंकणी भाशा अदीक गिरेस्त करचे खातीर युवा पिळगेच्या लेखनाची, चिंतनाची गरज आसा, अशें डॉ. च्यारी हांणी सांगलें.

रुपेश ठाणेकार हांणी येवकार दितना आयोजना फाटलो हेतू स्पश्ट केलो आनी तरणे पिळगेक कोंकणीच्या वावरांत व्हड प्रमाणांत आस्पावन घेवपाचो सोपूत दिलो. ह्या वेळार कोंकणी राजभाशेक घटसाण दिवचे खातीर कितें करचें, ह्या विशयाचेर परिसंवाद जालो. प्रस्नमंजुषा, गोंयची कला आनी साहित्य, कविता वाचन सर्त,  उक्ती माची, कोंकणी ग्रूप डान्स सर्त तशेंच विद्यार्थी गुणगौरव अश्यो कार्यावळी आयोजीत केल्ल्यो.