भांगरभूंय | प्रतिनिधी
अ. भा. कोंकणी परिशदेचो नियोजन बसकेंत उलो
भांगरभूंय । प्रतिनिधी
बेळगांवः अखिल भारतीय कोंकणी परिशदेचें 33 वें अधिवेशन 26 आनी 27 ऑक्टोबराक मडगांवां रवीन्द भवनांत जातलें. ह्या अधिवेशना संबंदांतली बसका मंगळारा पै रिसॉर्ट्स, बेळगांवां जाली. अखील भारतीय कोंकणी परिशदेचे कार्यकारी अध्यक्ष चेतन आचार्य, येवकार समितीचे अध्यक्ष प्रशांत नायक, नामनेचे कोंकणी लेखक अनंत अग्नी आनी उजवाड परिवाराचे निमंत्रक लुईस रॉड्रिगीस, ज्येश्ठ पाद्री फादर नेल्सन पिंटो हांच्या मार्गदर्शनाखाला बसका जाली. गोंयचो कोंकणी लेखक आनी कार्यकर्तो फादर मावझीन आतायद हांचे अध्यक्षते खाला जावपी अधिवेशनांत वांटो घेवपाचो उलो चेतन आचार्य आनी हेर मानेस्तांनी बेळगांव आनी शिमे वयल्या वाठारांतल्या कोंकणी उलोवप्यांक मारला.
ह्या वेळार बेळगांव वाठारांतल्या अधिवेशनांतल्या वांगड्यांची नोंदणीय सुरू जाली. वांगडीपणाची नोंदणी बेळगावांतल्यान आसिस आनी एप्रोजीन आल्मेडा हांची नोंदणी करून सुरू जाली.
कोंकणीच्या मुखेल प्रवाहांत बेळगांव आनी घाटमाथो वाठारांतल्या दैवज्ञ, सारस्वत, क्रिस्तांव आनी कोंकण मराठा ह्या सर्व धर्मीक समाजांनी कोंकणी भास आनी संस्कृताय खूब प्रतिकूल परिस्थितींत सांबाळून दवरल्या, ह्या समाजाची विशेश दखल घेवची, असो उलो लुईस रॉड्रिगीस हांणी मारलो. हे बसके खातीर मिनीन गोन्साल्वीस, गिरगोल रॉड्रिगीस, आल्फ्रेड ब्रिटो, सेबास्टियन डिसोझा, आंतोन मंतेरो, पवन काकतीकर, श्रीपाद पै, आंतोन डिसूझा आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
